— 294 —
„Sajang kaoe dateng terlaloe laat,“ kata ia, „tjoba kaloe kaoe dateng lebih siang, nistjaja kaoe orang masi bisa meliat. Dengen sabetoelnja akoe maoe kasi taoe pada kaoe koetika akoe lagi makan-minoem dalem pesta perdjamoeannja Hok-tee-koen-ong, Tong-hong Liang, di kota Thwan-shia-tjoe, bilangan Lam-yang-hoe, itoe waktoe orang banjak bitjaraken bahoewa dalem ini djeman djarang ada djaga jang bisa membikin orang banjak djadi taloek dan kagoemin. Salah-satoe orang dengen maen-maen bilang bahoewa Tong-hong Toeako tergelar Hok-tee-koen-ong, kaloe ada orang jang brani pergi masoek ka dalem kraton keizer dan tjoeri saprangkat pakean karadjahan, kasiken Tong-hong Toako pake boewat mendapet taoe apa ia soeroep atawa tida sabagi satoe radja ; dan itoe orang jang bisa mentjoeri itoe pakean dengen sasoenggoenja bisa teritoeng sabagi soeatoe djago jang djempolan.
„Itoe waktoe tida ada orang jang brani mendjawab, tambahan akoe soeda terkena pengaroenja aer kata-kata, dengan tida berpikir pandjang lagi akoe lantas menjanggoepin bahoewa akoe maoe tjoba pergi ambil itoe pakean karadjahan. Itoe hal kaloe boekannja kabetoelan hari tahonnja baginda keizer, belon tentoe akoe bisa dapetken dengen begitoe gampang. Sebab itoe pakean lebih doeloe telah dikaloewarken dari goedang dan ditaro dalem itoe roewangan Keh-ie-tian, soepaja di hari berikoetnja gampang dipake. Begitoelah dengan tida banja soesa akoe soeda bisa tjoeri itoe barang dan zonder ada soeatoe manoesia jang mendapet liat. Boewat memenoehken djandji, akoe pergi anterken itoe pakean pada Tong-hong Toako dan ini hari akoe baroe sadja balik poelang dari Lam-yang-hoe. Kaloe sadja kaoe berdoewa dateng kamaren, tentoe tida aken bisa bertemoe sama akoe.“
„Ach, masa begitoe kabetoelan dan paa betoel soeda tida ada di sini ?“ menanja Heng Djoe Houw.
„Masa akoe maoe djoestaken kaoe orang.“ djawab Pek Kiok Hoa, „djika memangnja masi ada di sini, masa kanapa sih kaloe akoe kasi liat pada kaoe berdoewa ?"
