„Kita denger kabar angin dari orang-orang jang mendjadi kita poenja golongan,” kata Heng Djoe Liong, „tjoema sadja tadinja akoe tida brani pastiken apa itoe perkara memang betoel atawa tjoema kabar angin jang tida berdasar sadja dan ini hari, setelah mendenger Toako poenja katerangan, baroelah akoe taoe bahoewa itoe hal memang sasoenggoenja terdjadi. Tjoema sadja kaoe bisa melakoeken itoe perkara besar dan bikin djato perboewatannja orang-orang jang ternama, apa sebabnja kaoe djadi menjesel? Akoe boekannja memoedji Toako di depan moeka, kaoem lioklim di saloeroe negri boekan sedikit djoemblanja, tapi djangan kata ada jang bisa mentjoeri seprangkat pakean karadjahan dari baginda keizer, biar poen di dalem kraton poenja satoe poehoen atawa roempoet, djoega tida ada jang mampoe tjoeri. Tapi sekarang kaoe soeda bisa mentjoeri baginda keizer poenja pakean karadjahan, itoelah haroes sekali kita berdoewa menghatoerken slamet pada kaoe, sebab kaoe boleh dibilang mendjadi djago dari semoewa djago !”
„Apa ini boekannja soetoe perboewatan jang salah ?” menanja Jan Hoei.
„Masa perkara jang saroepa ini bisa dibilang salah !” kata Heng Djoe Liong.
„Akoe senantiasa berkoewatir bahoewa akoe soeda melakoeken satoe perboewatan jang salah dan salahnja besar sekali,” kata lagi Jan Hoei.
„Kaoe poenja perboewatan jang begitoe mengedjoetken dan menggemparken,” kata Heng Djoe Houw jang dari satadian tinggal boengkem sadja, „tjara bagimana bisa dibilang salah ? Orang jang seperti kita berdoesa, djangan kata mampoe tjoeri, liat sadja belon taoe liat. Toako, lantaran kaoe poenja kapandean tinggi dan kabranian lebar, akoe maoe memindjem kaoe poenja hawa boewat toeroet meloewasken akoe poenja pemandangan mata. Maka akoe sanget harep soepaja Toako soeka bawa kaloewar kasi kita orang menjaksiken bagimana roepanja pakean karadjahan dari soeatoe keizer.“
Kombali Pek Kiok Hoa tertawa.
