— 292 —
njoem dan sampe pada waktoe berdoedoek; djoega ia masi teroes haha hihi tertawa sembari menanjaken perdjalanannja itoe doewa orang.
„Berdoewa Hiantee poenja kadatengan dari tempat jang begitoe djaoe,” kata ia, „apa tjoema perloe dateng menegoekin pada akoe sadja atawa ada lagi laen oeroesan?”
„Pertama kita hendak menengokin pada Toako,” kata Heng Djoe Liong, „kadoewa masi ada lagi soetoe perkara ketjil jang tida terlaloe penting, hal mana kita ingin mendengar taoe…”
Koetika Heng Djoe Liong baroe bitjara sampe di sini, lantas kalitan Pek Kiok Hoa tertawa berkakakan.
„Akoe soeda mendoega bahoewa kadoewa Hiantee poenja kadatengan,” kata ia, „tentoe boekannja meloeloet boewat dateng menengokin padakoe dan ada oeroesan laen lagi jang lebih penting. Sekarang tjoba kadoewa soedara soeka toetoerken dengen teroes-terang sadja.”
„Kita denger kabar angin soetoe hal, jang mana kaloe kita menanjaken pada Toako, tentoe lantas bisa katahoean benar atawa tidanja,” kata lagi Heng Djoe Liong.
„Sabetoelnja oeroesan apa sih?” menegasken Pek Kiok Hoa.
„Kita denger orang-orang dari goeloengan lioklim rame bitjaraken bahoewa kaoe soeda tjoeri baginda keizer poenja saprangkat pakean karadjahan, belon taoe apa ini perkara betoel atawa tida ?”
Kembali Jan Hoei djadi tertawa bergelak-gelak.
„Benar, itoe hal memang sasoenggoenja telah terdjadi.“ kata ia achirnja. „Ini perkara lantaran di medan perdjamoean makan dipandang enteng oleh saorang laen, soeda membikin akoe djadi sanget mendongkol dan brangkat ka kota radja boewat mentjoeri baginda keizer poenja saprangkat pakean karadjahan itoe. Tapi ini semoewa lantaran oemoer moeda dan darah panas, dalem satoe waktoe koerang pikir lantas sadja lakoeken itoe perkara terlarang dan ini waktoe sekalipoen akoe merasa menjesal djoega tida ada goenanja. Berdoewa soedara bagimana bisa taoe ini hal ?
