„Trima kasi banjak,” djawab Heng Djoe Liong, „kita mengandel pada Toako poenja redjeki ada baek djoega. Dan akoe harap sadja Toako sendiri poen selamanja itoe ada slamat tida koerang satoe apa. Beberapa lama ini, lantaran kita sangat repot sama kita poenja peroesahan, djadi tida ada tempo boewat memberi hormat pada Toako di sini; sekarang di bilangan Liauwtong ada soetoe pekerjaan jang bisa mengasi kasoentoengan, kabetoelan kita liwat di sini, dengan memoeter akoe sengadja dateng boewat memberi hormat."
Koetika itoe doewa soedara Heng masoek berletoet, Pek Kiok Hoa lantas menjejak itoe doewa orang poenja lengan dan diangkat ka atas dan teroes dipimpin naik ke atas itoe tangga batoe masoek ka dalem satoe kamar-tetamo, di mana iaorang mengambil tempat doedoek. Soeda djadi biasanja, bila Jan Hoei katemoekan ini doea orang, ia sendiri berdoedoek di tengah-tengah dan itoe doewa soedara Heng mengapit dari doewa pinggiran.
Itoe doewa soedara Heng awasi Pek Kiok Hoa, jang itoe waktoe kelaitannja terlebih keren dan garang. Ia memake boengkoesan kapala boeseng jang terbikin dari soetra poetih dengen wiroe-wiroean meroepaken kembang, sedeng iapoenja badjoe terbikin dari soetra poetih jang tersoelam dan memake pinggiran emas, sedeng ia poenja badjoe dalem terbikin dari soetra idjo daon memake soelaman kembang besar. Iapoenja moeka jang boender tida berbeda sabagi dipoepoerin, kadoewa halisnja bagoes dan lemas, sedeng iapoenja kadoewa mata galak dan bertjahaja ; idoengja bangir, bibir merah dan giginja sebagi doewa baris moetiara. Tapi, biar poen romannja tjakep, toch iapoenja koelit moeka poetihnja poetjat dan ada bebrapa banjak teroetoean dan moeloetnja ada sedikit mentjong. Di iapoenja pinggang ada tergantoeng satoe pokiam jang tadjemnja di kadoewa fihak, terboengkoes dalem satoe saroeeng koelit ikan tjoetjoet jang berwarna idjo dan memake rombe-rombe dari benang soetra koening. Sadari moelai bertemoe Jan Hoei oendjoek iapoenja moeka jang berse
