kat Sioepie. Tjhio Peng menanjaken iaorang ada membawa bebrapa banjak orang.
„Doewa ratoes soldadoe kaki dan semoewanja soeda menoenggoe di tempat berdekatan dari sini,” manerangken Pang Tjin Kang. „Iaorang bersedia boewat menerima prentah dan bisa brangkat dalam segala waktoe.”
„Masi ada soeatoe hal,” kata Tjhio Peng. „Nanti pada sasoedanja waktoe maoe bertempoer, iaorang semoewanja moesti memakai satoe pertandahan kaen poetih atawa biroe di iaorang poenja kapala, sebab koewatir tida kakenalan, djadi kena memboenoeh erang sendiri.”
„Kaloe soeda sedia kita moesti lantas bergerak,” kata Tian Him Hoei. „Sebab kita perloe moesti membantoein pada itoe doewa soedara Heng, jang soeda brangkat doeloean, djangan sampe iaorang mendapet tjilaka.”
„Kaloe begitoe,” menjelak Pang Jan, „akoe maoe brangkat sekarang, jang boleh dianggep sabagi barisan jang kadoewa.”
„Kita sabagi barisan jang katiga,” kata Thio Liong dan Tio Houw.
„Kita sabagi barisan jang ka’ampat,” kata Tjhio Peng pada Lam-hiap. „Sedeng Pang taydjin bersama Thio Touwsie dan Hoo Sioepie berikoet itoe doewa ratoes pasoekan balatentara sabagi barisan jang kalima. Nanti pada waktoe bertempoer, semoewa soldadoe moesti berseroeh dengen keras, bahoewa satoe pasoekan besar dateng menangkep pada itoe pendjahat jang soeda brani melakoeken pentjoerian dalem kraton baginda keizer. Dengen begitoe, sedikitnja bisa membikin itoe kawanan pendjahat djadi kaget dan katakoetan, hingga menggampangken kita poenja pakerdjahan.”
Pang Tjongpeng dan iapoenja doewa officier sabawahan manggoetken kapala serta menjanggoepin. Kamoedian Tjhio Peng minta Tji Tihoe mengepalai iapoenja oppas-oppas dan itoe doewabelas kapala oppas jang dibawa dari Khay-hong-hoe boewat membantoe dari sabelah blakang. Pada sasoedanja semoewa diatoer beres, marika itoe lantas pada brangkat.
Tjoba sekarang kita tengok pada Heng Djoe Liong dan
