-- 244 --
man keizer ditetapken ia masoek djadi orang pertapahan. Maka dengen apa-boleh-boewat Pauw Kong memesen soepaja semoewa hauw-wie pergi menganter Auw-yang Giesoe pergi ka gredja Tay Siang Kok.
Pada sasoedanja Pak-hiap membri hormat lagi pada Pauw Kong, ia lantas berdjalan kaloewar dengen dianter oleh kawan-kawannja menoedjoe ka gredja terseboet. Liauw Djian Hweeshio, kapalanja itoe gredja, lebih siang soeda mendapet kabar, maka itoe waktoe ia soeda soeroe moerid-moeridnja boenjiken tamboer dan lotjeng serta memboeka pintoe besarnja itoe gredja. Pak-hiap jang teranter oleh kawan-kawannja teroes masoek ka pertengahan medja sembajang bersoedjoet pada Hoet-tjouw kamoedian Auw-yang Tjhoen lantas berloetoet membri hormat pada goeroenja, sedeng laen-laen orang poen membri hormat pada itoe hweeshio.
Liauw Djian Tiangloo lantas merangkep kadoewa tangannja dan menjeboet:„O-mi-to-hoet.“ Itoe waktoe hweeshio terseboet soeda beroemoer saratoes taon.
„Moeridkoe,“ kata ia pada Pak-hiap, „kaoe boleh temenin doeloe pada semoewa Sietjoe boewat omong-omong di sini, akoe maoe masoek ka dalem bersamedi.“
Pak-hiap lantas adjak itoe semoewa orang ka satoe tempat trima tetamoe, tida antara lama kamoedian ada bebrapa banjak hweeshio ketjil jang membawaken thee boewat marika itoe.
„Kita orang moelai dari sekarang berpisahan sama soedara Auw-yang, bila kamoedian kita bertemoe lagi dengen ianja, tida bisa berlakoe lagi sabagimana sekarang,“ kata Tjhio Peng. „Sebab moelai dari sekarang ia soeda menjingkir dari perdjalanan doenia, boewat mejakinken ilmoe jang bisa mendapet soeatoe badan, jang tida bisa djadi roesak boewat selama-lamanja.“
„Soetee, kaoe poenja omongan itoe terlaloe berat boewat akoe trima,“ djawab Pak-hiap. „Sabetoelnja akoe ini tida mempoenjai peroentoengan bagoes sabagimana kaoe orang semoewa. Kaoe orang di hari kamoedian bisa mendapet
