FATSAL XXI.
Tapi itoe doewa orang lantas keroetken halisnja dan berkata: „Akoe masi koewatir koerang sampoerna; kaloe sadja ini tida maoe dengeri kita poenja omongan itoe, habis bagimana?”
„Kaloe ia tida maoe dengerin kaoe poenja omongan tadi itoe, akoe adjarin lagi soeatoe omongan,” berkata sampe di sini, kombali Tjhio Peng bisik-bisik di koepingnja itoe doewa orang.
Sekarang itoe doewa soedara Heng baroe oendjoek moeka girang.
„Ja, ja, betoel, bagoes!” kata iaorang dengen berbareng.
Begitoelah iaorang lantas membekal masing-masing poenja sendjata dan berpamitan pada orang-orang di sitoe, teroes kaloewar dari itoe roemah makan. Pada sasoedanja itoe doewa soedara brangkat, Tian Him Hoei jang djoedjoer merasa tida tahan boewat tida memboeka soewara.
„Tjhio Sieko,” kata ia, „itoe doewa orang poenja kapandean sangat berwates dan satoe kali ini kaoe soeroe iaorang pergi ka sana, djangan-djangan iaorang akan mendapet tjilaka.”
„Tida apa, akoe soeda mempoenjai satoe daja bagoes,” djawab Tjhio Peng.
Djoestroe pada waktoe orang lagi bitjara, mendadak kaliatan Pang Tjongpeng mendatengin dari loewar bersama doewa orang laen. Dan itoe doewa orang poenja dandanan lantas bisa dikenalin sabagi officier dari balatentara negri, sebab ada ampir bersamahan sama itoe Tjongpeng.
Semoewa orang pada berbangkit dari tempat doedoeknja boewat menjamboet pada itoe tiga tetamoe. Tjhio Pang lantas adjar kenal Thio Liong. Tio Houw dan Pang Jan sama Pang Tjin Kang Tjongpeng. Di laen fihak itoe Tjongpeng adjar kenal pada Tjhio Peng dan Tian Tjiauw itoe doewa orang jang ia bawa, jang satoe bernama Thio Kan berpangkat Touwsie dan jang laennja bernama Hoo Hoei berpang-
