„Ach, Yauw Thauw-nia,” kata ia, „marilah kita sama-sama minoem ini arak jang akoe dapetken dengen zonder kaloewarken oewang. Hajolah, kaoe boleh moelai menioep trompet.”
„Di sini mana ada trompet ?” menanja Yauw Tjeng.
„Och, kaoe tida mengarti! Kaloe minoem arak diglogok dari moeloet-botolnja, itoelah jang dinamaken menioep trompet.”
Dalem hatinja Yauw Tjeng berpikir, kaloe ia tanjaken oeroesanuja Oet-tie Liang di sini, belon tentoe apa ia maoe tjeritaken atawa tida; taro kata ia maoe tjeritaken, djoega belon tentoe apa soenggoe-soenggoe atawa tida. Sebab kaloe ia bitjara tida betoel, akoe tida sanggoep pikoel itoe kasalahan. Maka ada lebih baek akoe adjak sadja ia pergi ka sana boewat kasi katerangan sendiri. Tapi kaloe ia tida maoe dan bikin riboet, habis bagimana? Akoe moesti pantjing ia sampe di soeatoe tempat jang sedikit djaoe, kamoedian dengen zonder banjak bitjara lagi akoe panggoel ia dan bawa pergi.
Sasoedanja ia berpikir tetap lantas berkata: „Lo-sam, mari sini, akoe maoe bitjaraken soeatoe oeroesan penting.”
Ong Tit lantas berbangkit dan menghamperi bebrapa tindak. „Tjeritakenlah, apa jang kaoe maoe bilang.”
„Kaoe madjoe lagi brapa tindakan,” kata Yauw Tjeng.
Ong Tit menoeroeti sabagimana telah diminta; tapi Yauw Beng berdjalan teroes dan berkata lagi: „Mari kita djalan lagi bebrapa tindak, akoe maoe bitjara bisik-bisik sama kaoe.”
Begitoelah sampe bebrapa kali dioelangken, sahingga sampe di sabelah loewarnja itoe moeloet djalanan Louw-an-san. Hal mana soeda membikin Ong Sam djadi koerang senang dan berkata: „Sabetoelnja kaoe maoe bitjaraken oeroesan apa sih ?"
Dengen katjepatan seperti kilat, Yauw Tjeng menjengkilit sama kakinja, ampir dalem sa at itoe djoega Ong Tit lantas djato meloso ka tanah. Kamoedian Yauw Tjeng lantas memboeka itoe kapala-kampoeng poenja tali pinggang, jang di-
