— 282 —
lanken kahormatan besar, tapi Tjhio Peng menjega sembari kedipin matanja. Itoe eigenaar lantas mengarti dan oeroengken itoe niatan dan sama-sama masoek ka dalem itoe roemah makan, di mana itoe eigenaar mendjalanken kahormatan pada itoe tiga orang sabagimana biasanja.
„Apa kita poenja oeroesan ini kaoe soeda taoe?” menanja Tjhio Peng.
„Akoe telah denger kabar dari Yauw Tjeng, tapi ia minta akoe pegang resia,” manerangken itoe eigenaar roemah makan.
„Ja, itoe memang betoel. Malah kaoe moesti pesen wanti-wanti pada kaoe poenja penggawe-penggawe tida boleh bikin riboet di loewaran. Sebab satoe kali ini resia tersiar, nistjaja itoe pendjahat bisa melolosken diri dan kaoe aken mendapet hoekoeman jang boekan enteng.”
Soeda tentoe sadja itoe eigenaar menjanggoepin boewat mamegang resia. Itoe waktoe Thio Liong, Tio Houw, Pang Jan dan kadoewa soedara Heng kaloewar menjamboet. Tjhio Peng lantas adjar kenal lima Hanw-wie pada Tji Tihoe, pada sasoedanja mendjalanken kahormatan satoe dengen laen, marika berdoedoek di soeatoe roewangan besar sembari minoem thee. Sedeng djongos itoe hotel dengen repot menjediaken aer boewat tjoetji moeka. Tio Houw tjeritaken bahoewa iapoenja kadatengan ka sini ada atas pengoendjoekannja Yauw Tjeng.
„Sekarang Yauw TJeng pergi ka mana?” menanja TJhio Peng.
„Ia pergi mentjari katerangan tentang Pek Kiok Hoa.” djawab Tio Houw.
Pada sasoedanja orang pada habis dahar dan lagi pada minoem thee, mendadak ada dateng masoek saorang, jang di atas poendaknja memanggoel satoe orang. Hal mana soeda membikin semoewa orang djadi heran. Ternjata orang itoe boekan laen dari Yauw Tjeng, jang itoe waktoe lantas lepasken barang panggoelannja ka atas djoebin, kamoedian ia tekoek sabelah loetoetnja di hadepan Tjhio Peng.
