„Oendang sadja ia dateng masoek ka sini,” kata Tji Koan.
Tida antara lama, di sabelah loewar ada kadengeran orang mendehem dan bertindak masoek itoe Tjongpeng, jang dalem hatinja merasa sedikit mendongkol Tihoe tida menjamboet iapoenja kadatengan; tapi ia tida taoe bahoewa itoe Tihoe lagi menemenin Tian Him Hoei dan Tjhio Peng, jang soeda tentoe sadja tida bisa pergi menjamboet padanja. Sabagitoe lekas itoe Tjongpeng masoek, Tji Koan lantas mengangkat kadoewa tangan membri hormat sampe kadoewa tangannja ampir mengenaken djoebin.
„Akoe tida bisa menjamboet toewan dari kadjaoehan.” kata ia, „harep sadja kaoe soeka membri ma'af. Sekarang akoe maoe adjar kenal pada ini doewa taydjin jang dateng dari kota radja. Ini ada Tian Him Hoei taydjin dan ini ada Tjhio Tiang Tek taydjin; dan inilah Pang Tjin Kang tay-djin, Tjongpeng di ini kota.”
Itoe tiga orang lantas membri hormat satoe sama laen. Tian Him Hoei pandang itoe Tjongpeng toeboenja tinggi besar dan moekanja seperti pantat koewali. Romannja garang dan badannja pasek. Sedeng itoe Tjongpeng meliat Tian Him Hoei jang romannja tjakep dan gagah, sanget bertentangan sama roepanja Tjhio Peng jang seperti saorang sakit.
„Akoe tida mengatahoei kadoewa taydjin dateng ka ini tempat, hingga akoe tida bisa dateng menjamboet, harep sadja soeka ma'afken akoe poenja kadosahan itoe,” kata Pang Tjin Kang. „Djika kadoewa taydjin tida menampik, akoe maoe mengoendang kadoewa taydjin bersantap dan minoem sedikit arak di akoe poenja kantoor."
„Nanti doeloe,” kata Tjhio Peng, „perkara makan minoem ada gampang; tapi kita poenja kadatengan ka sini ada membawa prentahnja Pauw Siangya boewat mengoeroes soeatoe pakerdjahan jang sanget penting.”
„Pakerdjahan penting apa taydjin, apa akoe toeroet mendapet taoe?”
„Inilah djoega sebabnja maka kita telah mengoendang taydjin dateng ka sini,” kata Tjhio Peng. „Itoe Louw-an-san
