— 279 —
Tian Tjiauw: tapi Hwan-kang-tji lantas gerakin tangannja menjega.
„Itoe sama-sekali tida perloe dan akoe hatoerken banjak trima kasi lebih doeloe taydjin poenja boedi kabaekan itoe,” kata ia. „Di sini apa ada ambtenaar militair jang pande ?”
„Kita di sini ada mempoenjai soeatoe Tjongpeng,” djawab Tji Koan, „dan akoe denger kabar ini Tjongpeng taydjin ada kaloewaran soldadoe biasa, lantaran kapandeaanja ia soeda bisa naek ka tingkatan jang begitoe tinggi. lapoenja ilmoe kapandean tida perdoeli di atas koeda atawa di bawah, semoewanja ada sanget bagoes. Lagian djika perloe memake pasoekan balatentara negri, moesti mengandel sama bantoeannja ini orang baroelah bisa beres.”
„Siapa namanja itoe Tjongpeng taydjin ?” menanja Hwan-kang-tji.
„Pang Tjin Kang dan tergelar Tan-pian-Tjiang,” kata itoe Tihoe
„Kaloe begitoe, akoe harep taydjin soeka pergi mengoendang itoe ambtenaar militair dateng ka sini.”
Tji Koan lantas panggil lagi orangnja jang menoenggoe di loewar dan soeroe ia membawa satoe kaartjis nama boewat pergi mengoendang pada Pang Tjin Kang Tjongpeng dateng ka sini boewat berdamiken soeatoe oeroesan jang sanget penting. Itoe orang lantas berlaloe boewat melakoeken itoe prentah. Tji Koan menanjaken bebrapa perkara jang terdjadi di kota radja pada Tjhio Peng, kamoedian ia bitjaraken djoega perkara di Siang-yang-hoe. la menjataken menjesel atas meninggalnja Kim-mo-tji, Pek Giok Tong almarhoem. Sebab doeloe koetida Tji Koan mendjabat pangkat Tikoan di district Siang-hoe, ialah jang mengoeroes perkaranja Gan Sin Bin dan Hwan Tiong Gie dan lantaran ia berdjasa dalem mengoeroes ini doewa perkara, Pauw Kong lantas poedjiken boewat ia mendjabat pangkat Tihoe di Tjitjioe. Pada waktoe iaorang lagi bitjara, soeatoe, penggawe kasi taoe bahoewa Pang Tjongpeng taydjin soeda dateng dan bakal dikatemoeken di mana.
