kontjonja Siang-yang-Ong jang soeda tertangkep di segala tempat boleh lantas dikasi hoekoeman mati di itoe tempat djoega tida perloe dibawa lagi ka kota radja. Sasoedanja kaloewarken itoe prentah-prentah, baginda keizer lantas balik masoek ka kraton Hong-yang-kiong dengen doedoek iapoenja djoli terboeka.
Pauw Kong berdjalan kaloewar dari sabelah depan dan naek iapoenja djoli jang menoenggoe di kamar peranti menoenggoe dekat kraton tachta karadjahan, kamoedian ia teroes balik poelang ka Khay-hong-hoe. Di laen fihak, itoe orang-orang poen meninggalken itoe taman radja dan kaloewar lagi dari Tiat-houw-boen dan teroes menoedjoe ka Khay-hong-hoe.
Sasampenja di Khay-hong-hoe, sabagimana biasanja semoewa orang pada hatoerken slamet pada itoe orang-orang jang baroe menerima koernianja keizer, Kong-soen Tjek dan Goei Tjiang poen tida dikatjoewaliken. Sasoedanja itoe baroelah iaorang pergi mengadep pada Pauw Kong.
Baginda keizer kasi verlof doewa boelan, sasoedanja itoe baroe balik kombali boewat mendjalanken masing-masing poenja djabatan,“ kata Pauw Kong. „Di hari esok, sabagimana keizer soeda prentahken, kaoe orang tida perloe mengadep sendiri boewat hatoerken trima kasi, hanja soeda tjoekoep berboewat begitoe di sabelah loewar pintoe kraton.“
Di pagi jang berikoetnja Pauw Kong toeloeng toelisken marika itoe poenja request jang menghatoerken trima kasi, sedeng itoe semoewa orang menoeroet sabagimana lebih doeloe soeda dipesen. Pada sasoedanja mengadep ka kraton sabagimana biasanja, Pauw Kong lantas balik poelang ka Khay-hong-hoe. Semoewa orang mengiringken Pak-hiap boewat berdjoempa sama itoe ambtenaar besar dan berpamitan, sebab ia hendak pergi ka gredja Tay Siang Kok doewat potong ramboet dan masoek mendjadi hweeshio.
Pauw Kong meliat pada Auw-yang Tjhoen hatinja merasa tida tega berpisahan; tapi baginda keizer sendiri tida bisa menghalangin iapoenja niatan, malah sabaliknja dengen fir-
