„Itoelah akoe tida taoe dengen terang. Ada orang bilang dari Lamyang-hoe, ada djoega jang bilang dari Tintjioe, tapi tida taoe jang mana lebih betoel.“
„Itoe tida mengapa,“ kata Tjhio Peng. „Tapi sasoenggoenja akoe maoe kasi taoe pada kaoe, itoe orang ada pendjahat jang telah tjoeri baginda keizer poenja pakean karadjahan. Sekarang atas prentahnja Siangya kita dateng ka sini boeat menangkep padanja. Akoe harep sadja kaoe moesti pegang keras ini resia, kerna sanget dikoewatir itoe pendjahat mendapet kabar dan lantas maboer. Sekarang akoe maoe minta kaoe poenja bantoean, boeat pergi tjari taoe, apa itoe pendjahat ada di roemah atawa tida; tapi moesti hati-hati sekali, djangan sampe ia bisa menjioem baoe dan teroes merat.“
„Apa ini waktoe ia ada di roemah atawa tida, itoelah akoe tida taoe pasti; sekarang akoe maoe pergi tjari taoe, kamoedian akoe balik kasi kabar pada taydjin.“
„Kaloe begitoe, baeklah; tapi kaoe moesti pergi doeloe ka itoe roemah makan merk Hak Hin di pintoe kota Timoer, di mana kaoe mentjari pada Thio Liong, Tio Houw, Pang Jan, Heng Djoe Liong dan Heng Djoe Houw, itoe bebrapa loya, pada siapa kaoe soeroe iaorang dengen diam-diam brangkat ka Dji-tjan-tin dan mentjari satoe tempat boewat mondok; tapi djangan sekali kasi taoe apa-apa pada orang-orang di itoe roemah makan. Kaoe pikir roemah makan apa jang baek, soepaja kamoedian dengen gampang akoe bersama kaoe poenja taydjin menjoesoel ka sana?“
Yauw Tjeng berpikir sabentaran, kamoedian ia lantas berkata: „Di sana ada satoe Sam-gie-tiam, jang poenja tempat loewas dan rawatannja baek; sedeng eigenaarnja poen ada orang jang bakerdja dalem kita poenja kantoor sabagi oppas. Maka akoe rasa ini hotel ada sampe baek.“
„Baeklah dan kaoe boleh lantas brangkat,“ kata Tjhio Peng.
Tji Koan maoe soeroe orangnja sediaken satoe medja santapan dan minoeman sabagi kahormatannja Tjhio Peng dan
