Tatkala itoe rombongan orang dari Khay-hong-hoe sampe di pintoe-kota Tjeng-hong-boen boewat mengasi liat soerat katerangan pada pendjaga pintoe kota, mendadak itoe doewa belas kapala oppas dengen berkoeda dateng menjoesoel. Begitoelah iaorang lantas brangkat sama-sama. Tida ditjeritaken dalem iaorang poenja perdjalanan. Pada soeatoe hari iaorang soeda sampe di pintoe kota Timoer dari itoe afdeeling Tjitjioe. Tjhio Peng soeroe pengikoetnja pergi mentjari soeatoe roemah makan jang baek dan bresih dan achirnja iaorang menginep di satoe roemah makan jang memake merk Hok Hin, sedeng Tjhio Peng bersama Tian Him Hoei dengen membawa satoe pengikoet pergi katemoeken Tihoe di ia-poenja kantoor.
Itoe pembesar afdeeling soeroe orangnja memboeka pintoe tengah dan ia sendiri kaloewar menjamboet kadatengannja itoe doewa ponggawa dari Khay-hong-hoe. Tian Tjiauw dan Tjhio Peng lebih siang soeda mengeboet masing-masing poenja pakean jang penoeh deboe. Tatkala soeda dateng deket, iaorang liat itoe Tihoe memake iapoenja pakean kabesaran, jang memake leher boender dari soetra merah, lapoenja koelit moeka poetih dan tjakep ditimpalin sama tiga baris koemis pandjang. Koetika meliat pada itoe doewa orang, lantas sadja ia membri hormat sampe kadoewa tangannja ampir mengenaken boemi. Tian Tjiauw dan Tjhio Peng membales sabagimana pantesnja. Itoe Tihoe oendang tetamoenja masoek ka satoe kamar-boekoe, di mana iaorang berdoedoek dan disoegoehi thee.
„Oleh kerna akoe tida mendapet taoe lebih siang atas kadoewa toewan poenja kadatengan,” kata itoe ambtenaar, „djadi akoe tida bisa menjamboet dari djaoe. Harep sadja kadoewa toewan soeka membri ma'af.”
„Oh, itoelah kita tida sanggoep trima,” djawab itoe doewa orang.
„Lo-Soe Siangya, di kota radja apa selamanja ini ada baek ?”
