nja, perloe sekali moesti hati-hati, djangan sampe ia menjioem baoe dan lantas maboer.”
„Akoe soeda pikir soeatoe daja-oepaja jang baek, asal sadjakaoe berdoewa tida memboeka resia, kaoe orang bakal mendapet gandjaran jang teroetama. Sekarang mari mengikoet padakoe boewat mengadep pada Siang-ya.”
Itoe doewa soedara lantas manggoetken kapala. Begitoelah iaorang berikoet djoega Tian Tjiauw sama-sama masoek ka dalem boewat mengadep pada Pauw Kong. Tatkala iaorang sampe di moekanja itoe kamar batja, lebih doeloe minta Pauw Hin masoek kasi taoe dan itoe ambtenaar lantas oendang marika itoe masoek ka dalem. Pada sasoedanja djalanken kahormatan sabagimana biasa, Tjhio Peng lantas toetoerken dengen terang apa jang itoe doewa soedara Heng soeda bitjaraken, sedeng itoe doewa orang lantas madjoe menghamperi boewat menerima salah; tapi Pauw Kong lantas gerakin tangannja.
„Kaoe berdoewa sama-sakali tida berdosa satoe apa,” kata ia. „Sekarang kaoe orang soeda petjahken itoe resia hingga bisa dikatahoei di mana sarangnja itoe pendjahat, poenkok sabaliknja maoe tjatet kaoe berdoewa poenja gandjaran.”
Kamoedian itoe ambtenaar kasi prentah Tian Tjiauw dan Tjhio Peng pergi ka Louw-an-san menangkep itoe pendjahat, sedeng orang-orang jang maoe dibawa boleh menoeroet sasoekanja sendiri boewat mamilih
„Orang-orang jang aken dibawa adalah kadoewa Heng Hauw-wie, Pang Hauw-wie dan bebrapa poeloeh oppas-oppas politie dari ini kantoor,” kata Tjhio Peng. „Salaennja itoe aken memoehoen Siangya soeka kasiken satoe soerat dienst boewat pembesar di itoe tempat, kamoedian sasampenja di sana kita aken berboewat dengen meliat gelagat.”
„Kadoewa Hou-wie boleh menoenggoe doeloe di loewar dan sekalian mamilih itoe oppas-oppas jang bakal dibawa,” kata Pauw Kong.
Itoe ampat orang lantas pergi ka loewar dan memanggil itoe doewa kapala oppas, Han Tjiat dan Touw Soen, soeroe
