lekin matanja boewat meliat apa-apa."”
„Sekarang ia tinggal di mana ?” menanja Tjhio Peng.
„Di soeatoe tempat dalem bilangan afdeeling Tjitjioe, jang dinamaken Louw-an-san, Pa-pi-kok, sedeng di blakang itoe boekit (Pi-pa-san) ada satoe telaga jang diseboet Piauw-jan-ouw.”
„Kaloe soeda dikatahoei di mana iapoenja sarang, perkara menangkep padanja boekan perkara soeker.”
„Masi ada lagi soeatoe hal,” manerangken lagi Heng Djoe Liong, „djika maoe menangkep padanja di Louw-an-san, Pi-pa-kok, tida nanti bisa berhasil djika mentjari pada saorang jang bernama Jan Hoei.
„Apa ia soeda memake nama laen?”
„Sadari bermoela ia dateng ka itoe tempat, ia tida memake namanja jang sedjati dan memake shenja iapoenja nene loewar.”
„She apatah itoe?” manegasken Tjhio Peng.
„She Oet-tie dan nama jang ia pake satoe hoeroef Liang. Tegasnja Pek Kiok Hoa di tempat kadiamannja terkenal dengen itoe nama palsoe Oet-tie Liang. Di Pi-pa-kok ia mendiriken satoe goendoekan roemah-roemah dengen pekarangan jang loewas, semoewa boedjang-boedjang ia jang panggil sendiri. Pendoedoek di sitoe lantaran tida taoe iapoenja asal-oesoel jang sasoenggoenja, semoewa bahasaken ia Oet-tie Tay-khoa-djin. Sebab iaorang mendapet katerangan bahoewa itoe Oet-tie Tay-khoa-djin ada toeroenan orang berpangkat. Djika ia pergi kaloewar „beroesaha” dan poelang dengen menggondol banjak harta dan barang berharga, ia bilang di banjak tempat ia ada mempoenjai peroesahan besar, itoe waktoe ia baroe habis pergi bikin peritoengan dan orang banjak jang tida taoe satoe apa lantas sadja pertjaja iapoenja obrolan itoe. Lagian dalem perkara oewang iapoenja tangan sanget terlepas dan orang-orang kampoengan jang miskin, soeda tentoe sadja djadi merasa sanget soeka padanja, sedeng iapoenja orang-orang tida ada satoe jang tida mengindahken padanja. Maka kaloe maoe menangkep pada-
