mengarti atawa tida atoerannja orang melakoeken pakerdjahan negri? Dan kaoe orang poenja kawadjiban haroes mengoeroes pakerdjahan apa?”
„Lantaran kita berdoewa masi baroe, banjak hal jang tida begitoe mengarti," kata itoe doewa orang dengen berbareng. Maka kita mengharep soepaja taydjin soeka membri adjaran.”
„Kaoe orang, begitoe poen kita, poenja kawadjiban haroes menangkep pendjahat dan pentjoeri,” kata Tjhio Peng. Samentara itoe pentjoeri jang lakoeken pentjoerian di dalem kraton, boleh dibilang soeatoe perkara penting. Djika sampe temponja doewa boelan itoe pendjahat masi djoega belon bisa tertangkep, baginda keizer djadi goesar, nistjaja Siangya bisa bisa dipetjat dari djabatannja. Dengen begimana apa Siangya bisa kasi ampoen pada kita orang? Terang sekali jang kita semoea poen tida bisa tinggal senang dalem kita poenja kadoedoekan jang sekarang. Akoe koewatir kaoe berdoewa koerang mengarti, terpaksa akoe manerangken dengen melit. Maka kaloe sadja kaoe berdoewa ada mengetahoei apa-apa tentang itoe pentjoeri, terlebih baek kaoe orang lantas tjeritaken sekarang; sabaliknja djika kaoe orang bilang tida taoe satoe apa, bila kamoedian ternjata kaoe orang soeda sengadja menoetoep resia, nistjaja kaoe orang poenja dosa aken djadi samingkin berat.
„Tida perdoeli siapa djoega adanja orang itoe, maoe poen sobat baek, soedara dari satoe kandoengan, atawa poen ajah dan paman, soeatoe kadosahan tjoema haroes ditanggoeng sadja oleh itoe orang jang melakoeken. Maka lebih baek ditjeritaken terlebih doeloe, agar diri kita bisa terloepoet dari bahaja. Akoe lantaran koewatir kaoe orang koerang mengarti dan sekarang lantaran takoet lantas menoetoep resia, nanti pada waktoe itoe pendjahat soeda tertangkep dan kaoe orang kena dirembet oleh itoe pendjahat, biar poen kita orang maoe menoeloeng, djoega soeda kasep. Apa sekarang kaoe orang soeda mengarti?”
Heng Djoe Houw mengawasi pada soedara toewanja.
„Engko, apa kaoe soeda denger itoe omongan?” kata ia.
