― 261 ―
FATSAL XIX.
Tjhio Peng meliat itoe doewa orang poenja sikap begitoe roepa, lantas soeda mengarti, tapi ia poera-poera berkata: „Kaoe berdoewa kaloe betoel tida taoe, tida perloe djadi iboek, kita orang boleh selidikin sadja dengen soenggoe-soenggoe, boleh djadi dengen perlahan kita aken bisa mendapet katerangan.”
Semoewa orang tentoe sadja bilang baek. Kamoedian Tjhio Peng kasi prentah Han Tjiat dan Touw Soen, apabila itoe kapala-kapala oppas dari semoewa district jang termasoek di bawah prentahnja Khay-hong hoe dateng, itoe doewa orang boleh kasi taoe itoe perkara dengen terang dan kasi tempo dalem satoe boelan itoe perkara soeda moesti diselidikin dengen terang. Sahabisnja mamerentah, Tjhio Peng lantas tarik Tian Lam-hiap dan diadjak pergi masoek ka dalem roemah tinggalnja jang terseboet blakangan. Semoewa orang jang bakerdja di Khay-hong-hoe, masing-masing ada mempoenjai roemah tinggal jang terpisa. Itoe kadoewa soedara Heng tinggal di roemah jang teridar tembok di sabelah Timoer, sedeng Thio Liong, Tio Houw, Ong Tiauw dan Ma Han memake satoe petak di sabelah Timoer djoega dan Pang Jan berdiam di satoe roemah samping. Itoe semoewa orang pada balik poelang ka masing-masing poenja tempat tinggal, sedeng Tian Tjiauw bersama Tjhio Peng satelah sampe di tempat jang ditoedjoe, orang jang terseboet blakangan lantas berkata:
„Tian Toa-tee, apa kaoe dapet liat bagimana sikapnja itoe doewa soedara Heng?”
„Tida, akoe tida liat apa-apa,” djawab orang jang ditanja. „Tapi, Sie-ko, kaoe dapet liat itoe doewa orang poenja sikap bagimana?”
„Akoe doega keras itoe doewa soedara ada taoe apa-apa dalem ini oeroesan.”
„Ach, Sie-ko, djangan soeka sembarang toedoeh orang.”
„Tida, akoe tida sembarang toedoeh orang. Kaoe sendiri
