― 259 ―
itoe pendjahat; tjoema sadja iapoenja bikinan ada lebih rapi dan bagoes, lantaran apa bisa meninggalken tanda titikan jang lebih njata dan bisa menempel lebih baek.
Itoe waktoe Tjhio Peng lantas berpaling pada Thio Liong, Tio Houw, Ong Tiauw dan Ma Han.
„Toewan-toewan,” kata ia, „sekarang di sini tida ada orang loewar dan kaoe berampat asalnja kaloewaran dari golongan lioklim, dengen begitoe, tentoelah bisa taoe pendjahat dari mana jang biasa soeka meninggalken itoe matjem tanda pada sasoedanja ia melakoeken pakerdjahannja. Djika kaoe orang taoe akoe sanget harep soepaja soeka mengasi katerangan.”
Tiga dari itoe ampat orang, jaitoe Thio Liong, Ong Tiauw dan Ma Han, satelah mendenger itoe pertanjahan, moekanja semoewa mendadak berobah seperti tjabe dan tida bisa mendjawab; tapi Tio Houw kaliatannja tida merasa maloe atas itoe oeroesan jang soeda laloe.
„Tatkala kita berampat melakoeken pakerdjahan membegal di Touw-liong-kang,” kata ia, „itoe kawanan bangsat moeda masi belon dilahirken; maka djika taydjin maoe menanjaken perkara-perkara jang terdjadi pada bebrapa tahon berselang, boleh djadi kita masi bisa taoe djoega bebrapa fatsal. Samentara ini kawanan begal jang moentjoel blakangan, lantaran kita soeda kaloewar dari itoe golongan, soeda tentoe sadja kita tida taoe satoe apa; kaloe maoe dibitjaraken, marika itoe boleh teritoeng mendjadi kita poenja boejoet !”
Tio Houw poenja omongan jang paling blakang soeda membikin Heng Djoe Liong dan Heng Djoe Houw djadi mendongkol. Marika memandang pada itoe orang jang bitjara dengen moeka merengoet dan mata mendelik.
„Tio Soe-loya, kaoe tida perloe djadi kakroepoekan,” kata lagi Tjhio Peng. Kita poenja nabi bilang: „Apa jang kita taoe boleh bilang taoe dan jang tida taoe djoega boleh bilang tida taoe.”
„Ah, kombali kaoe kaloewarken itoe pepatah dari Soesie,” kata Tio Houw, „akoe mana bisa mengarti.”
