kata Tjhio Peng, „boleh djadi djoega kaoe orang masi belon taoe terang lantaran oeroesan apa, maka sekarang akoe maoe manerangken lagi satoe kali. Baginda keizer telah kahilangan iapoenja saprangkat pakean karadjahan dan itoe barang ditjoeri oleh pendjahat dari loewar dan itoe pentjoeri roepanja sanget brani; sebab pada sasoedanja melakoeken itoe pentjoerian, ia lantas bikin satoe tanda dengen satoe tjap jang berlobang dan dalemnja terisi boeboek poetih, meroepaken satangke boengah seroeni berikoet satoe batang dan tiga daonnja, di atas daon-pintoe Hong-siang-boen. Kaoe orang soeda biasa mengoeroes perkara perampokan dan pentjoerian, apa kaoe orang taoe itoe pendjahat jang soeda meninggalken tanda saroepa itoe ada pendjahat dari mana ?”
Itoe doewa kapala oppas lantas berloetoet.
„Kita orang sasoenggoenja tida taoe,” kata marika dengen berbareng kaloe kita orang taoe sedikit sadja apa-apa jang berhoeboeng sama ini hal, nistjaja kita orang lebih siang soeda hatoer bertaoeken pada taydjin.”
„Kaoe orang dengen enak sadja boleh bilang begitoe,” kata Tjhio Peng sembari bersenjoem sindir. „Baginda keizer telah kasi tempo anampoeloeh hari boewat bikin terang ini perkara dan Siangya kasi tempo satoe boelan. Maka kaloe sadja ini perkara tida bioa dibikin terang dalem tempo tiga-poeloeh hari, kaoe orang haroes hati-hati sama toengkat jang bakal merangket pada kaoe orang. Sekarang kaoe orang boleh pergi menoenggoe di loewar.”
Disini haroes diterangken prihal itoe tjap, jang itoe pentjoeri telah goenaken boewat bikin itoe tanda. Biasanja anak-anak sekola soeka bikin samatjem permaenan dari samatjem kantong kertas minjak, di moekanja itoe kantong ditoesoekin sama satoe poesoet tadjem meroepaken satoe koera-koera ; kamoedian dalem itoe kantong diisiken poepoer poetih. Itoe anak-anak goenaken itoe kantong ditepokin pada kawannja poenja bebokong dan lantas sadja di atas itoe tempat jang bekas ditepok meninggalken tanda titikan poetih jang meroepaken koera-koera. Begitoe poen itoe pekakas jang digoenaken oleh
