tida perloe lagi preksa iaorang poenja katerangan,” kata Tan Lim.
„Dari sebab itoe pentjoeri ada orang loewar, soeda tentoe sadja tida ada perloenja bikin papreksahan pada orang-orang dalem.”
Tan Lim manggoetken kapala dan soeroe bebrapa orang kebiri menganter Pauw Kong dan doewa kawannja pergi kaloewar, sedeng ia sendiri lantas masoek ka dalem astana merapportken apa jang soeda terdjadi pada baginda keizer. Di laen fihak Pauw Kong satelah balik poelang ka Khay-hong-hoe, lantas kasi prentah soepaja Tian Tjiauw dan Tjhio Peng dateng ka ia poenja kamaz-batja boewat bitjara.
„Sekarang ini perkara kahilangan pakean, biar poen baginda keizer tida manetapken kapan waktoenja itoe pendjahat moesti tertangkep,” kata Pauw Kong, „tapi sabisanja moesti dengen lekas. Sebab kaloe bisa dapet tangkep itoe pendjahat dengen lekas, bila baginda keizer djadi moerka, nistjaja poenkok djoega aken mendapet gegeran jang, boekan enak.”
Itoe doe wa orang beroelang-oelang manggoetken kapala. Pauw Kong lantas gerakin tangan sabagi tanda jang itoe doewa orang boleh berlaloe. Begitoelah itoe doewa orang lantas balik kombali ka tempatnja Hauw-wie dan semoewa orang lantas pada menghamperi boewat menanjaken itoe perkara. Tjhio Peng koetika meliat di sitoe tida ada orang loewar, lantas toetoerken tjara bagimana kasoedahannja itoe penjelidikan di dalem astana. Kamoedian ia kasi prentah pada satóe penggawe dengen berkoeda pergi panggil pada semoewa kapala oppas dari ampat belas district jang berada dalem pegangannja Khay-hong-hoe boewat dateng mengadep. Itoe penggawe lantas brangkat melakoeken itoe prentah.
Soeda tentoe sadja kapala oppas dari Khay-hong-hoe jang paling doeloe dipanggil mengadep. Han Tjiat dan Touw Soen lantas masoek dan berdiri menoenggoe di satoe pinggiran dengen sikap hormat.
„Sekarang akoe panggil kaoe berdoewa dateng ka sini,”
