— 256 —
Tan Lim berdongak dan liat di atas pintoe Hong-siang-boen ada berpeta titik-titikan poetih jang meroepaken satoe boengah seroeni berikoet tiga lembar daon dan satoe tangkenja dan itoe semoewa terloekis oleh itoe titik-titikan poetih.
„Doeloean tida ada itoe tanda,” kata Tan Lim dengen heran.
Pauw Kong poen soeda dapet liat itoe loekisan boengah seroeni poetih, tapi tida mengarti apa sebabnja ada di sitoe. Tjhio Peng dan Tian Tjiauw lantas omong bisik-bisik sakoetíka lamanja, kamoedian Tían Him Hoei lantas menghamperi dan keboetken tangan badjoenja pada itoe daon pintoe jang ada terdapet itoe loekisan boengah seroeni poetih, dalem sa'at itoe djoega ada bebrapa banjak deboe poetih jang pada melajang di oedara, sedeng itoe loekisan boengah seroeni lantas djadi tida kaliatan lagi. Tian Him Hoei lantas menghamperi pada Pauw Kong.
„Itoelah ada soeatoe tanda jang telah ditinggalken oleh itoe pendjahat, jang telah tjoeri baginda keizer poenja pakean,” kata ia. „Sasoenggoenja ia itoe ada soeatoe pendjahat jang sanget brani sebab pada sasoedanja mentjoeri dengen sengadja soeda meninggalken itoe matjem tanda, sabagi djoega ia maoe kasi taoe siapa orangnja jang soeda melakoeken itoe pertjoerian.”
„Tjongkwan Loya boleh rapportken kasoedahannja kita poenja papreksahan pada baginda keizer,” kata Pauw Kong. „Akoe apa menoenggoe firman di loewar atawa pada besok pagi sadja pada waktoe akoe mengadep pada baginda keizer sabagimana biasanja ?”
„Itoe hal akoe maoe hatoerken semoewanja pada baginda keizer dengen terang,” kata Tan Lim. „Akoe harep kaoe soeka lekasan prentah orang pergi menangkep itoe pendjahat, sebab itoelah jang paling perloe.”
„Kaloe begitoe, akoe maoe poelang ka Khay-hong-hoe sadja,” kata Pauw Kong.
„Ja, baek; sekarang itoe penggawe-penggawe kraton kaoe
