— 254 —
satoe firman. Atas namanja baginda keizer diprentahken Tian dan Tjhio kadoea Hou-wie masoek ka Keh-ie-tian boeat lakoeken papreksahan !”
Itoe doewa orang jang berada di sabelah loewar lantas mendjawab: „Hamba berdoewa menerima prentah,” dan seabisnja berkata iaorang lantas naek dan masoek ka dalem itoe roewangan, kamoedian iaorang lantas pada berdongak dan mamereksa ka atas lelangit bebrapa lamanja. Itoe doewa orang lantas saling mengawasi dengen bersenjoem. Blakangan kombali iaorang meliat dan mamereksa lagi ka bebrapa tempat sakoetika lamanja.
„Tjongkwan Loya,” kata itoe doewa orang dengen berbareng. „Ini pendjahat datengnja dari loewar.”
Itoe kapala orang kebiri lantas tertawa berkakakan.
„Siangya,” kata ia, „djangan kata kaoe bisa mamereksa perkara di doenia dan di acherat, tapi baroesan kaoe bikin papreksahan bebrapa lamanja, sedikit poen kaoe tida bisa mendapet kanjatahan satoe apa; sekarang orang laen dengen satoe kali liat sadja lantas bisa mendapet taoe. Kadoewa Hou-wie, bagimana kaoe bisa taoe itoe pendjahat dateng dari loewar? Dan ia masoek dengen mengambil djalan dari mana ?”
„Itoelah gampang sadja dikatahoei; ia masoek dari palangan pintoe di sabelah atas dan kaloewarnja djoega dari sitoe,” menerangken itoe doewa orang.
„Kaloe baginda keizer tanjaken apa alesannja atawa boektinja, bagimana? ” „Tan Tjongkwan kaloe tida pertjaja,” kata Tian Tjiauw, „boleh soeroe orang pergi mengambil satoe tangga, kamoedian soeroe saorang pergi naek dan dengen satoe kali tarik sadja itoe palangan pintoe di sabelah atas tentoe bisa terlepas, Lagian oreng jang soeka berdjalan malem djika masoek dengen mengambil djalan dari palangan pintoe di sabelah atas, selamanja soeka masoek dengen tengkoeroep. Oleh kerna itoe, di laen-laen tempat ada terdapet deboe-deboe jang menempel, tapi di atas palang penahannja itoe pintoe,
