„Akoe rasa lebih baek preksa doeloe ka'adahannja itoe tempat katjoerian,” kata Pauw Kong, „sebab kaloe pentjoėri dari loewar, djadi tida perloe mengompes pada marika itoe.”
„Kaloe begitoe, baeklah; sekarang djoega kita boleh sama-sama brangkat.”
„Pauw Kong lantas kasi taoe bahoewa Tian Him Hoeil dan Tjhio Tek Tjiang moesti mengikoet padanja boewat bikin papreksahan. Sedeng itoe penggawe-penggawe kraton jang tadi dibawa oleh Tan Lim, disoeroe poelang doeloe boewat menoenggoe kabar. Tida antara lama itoe bebrapa orang telah sampe di kamar peranti menoenggoe di dalem kraton, Tan Lim adjak Pauw Kong, Tian Tjiauw dan Tjhio Peng masoek ka dalem. Pada sasoedanja iaorang meliwati banjak sekali pintoe-pintoe, baroelah iaorang sampe di itoe Keh-ie-tian.”
„Inilah jang dinamaken Keh-ie-tian,” kata Tan Lim sembari menoendjoek. „Mari mengikoeti akoe boewat bikin papreksahan.”
Tian Tjiauw dan Tjhio Peng tida brani naek ka atas tangga batoenja itoe roewangan, jang mendjadi tempat menoekar pakeannja baginda keizer dan iaorang menoenggoe sadja di sabelah bawahnja tangga itoe. Sedeng Pauw Kong mengikoeti itoe kapala orang kebiri bikin papreksahan di segala podjokannja roewangan, tapi sama-sekali ia tida bisa meliat tanda satoe apa.
„Pauw Siangya,” kata Tan Lim, „kaoe liat ini pendjahat apa orang dari loewar atawa boekan?”
„Ini perkara moesti soeroe Tian Hou-wie dan Tjhio Hou-wie jang menjelidikin baroelah bisa taoe,” djawab Pauw Kong.
„Kaloe begitoe mengapa itoe doewa orang tida maoe ikoet masoek ka sini?”
„Kaloe tida ada firman keizer iaorang tida brani sembarangan masoek.”
„Ah, kaoe orang terlaloe memake banjak peradatan,” kata Tan Lim, biarlah gantiken baginda keizer mengaloearken
