— 252 —
dalem goedang, ternjata soeda linjap, biar poen pintoe dan djendelanja itoe Keh-ie-tian tida terdapet karoesakan satoe apa atawa poen tanda-tanda bekas terganggoe. Belon taoe apa itoe barang ditjoeri oleh pendjahat atawa dari loewar atawa ditjoeri oleh orang-orang dalem kraton. Sekarang itoe kapala pendjaga dari Kei-ie-tian bersama iapoenja orang-orang sabawahan dipasrahken pada Khay-hong-hoe boewat dipreksa. Apabila itoe barang ternjata boekannja ditjoeri oleh orang-orang dalem kraton, diprentahken Khay-hong-hoe Hoe-in dengen membawa bebrapa Hauw-wie dateng ka Keh-ie-tian boewat bikin papreksahan.
Sahabisnja itoe „sengtji” dibatjaken, sabagimana biasanja Pauw Kong hatoerken trima kasi dengen menjeboet „Djoeng-djoengankoe Ban-swee Ban-ban-swee, hamba menerima prentah.” Kamoedian itoe firman ditaro di atas satoe medja sembajang dan djalanken peradatan sama Tan Lim menoeroet sapatoetnja.
„Tjongkwan Loya ada baek,” kata Pauw Kong.
Itoe kapala orang kebiri lantas mengakoe kadoewa tangan membales hormat sembari bersenjoem.
„Trima kasi, akoe harep Pauw Siangya poen ada baek,” kata ia.
Kamoedian satoe sama laen mengambil tempat doedoek dan disoegoehi aer thee, tapi pada sabelonnja Pauw Kong boeka soewara lagi, itoe orang kebiri soeda mendoeloein berkata: „Pauw Siangya, apa kaoe soeda bisa liat doedoeknja perkara ? Sadari Pek Ngo-loya sampe sekarang dalem kraton tinggal aman dan tida taoe ada orang bikin riboet lagi tapi sekarang itoe kariboetan ada terlebih heibat lagi dari doeloean. Sebab itoe Keh-ie-tian tida bisa dibandingken sama baginda keizer poenja taman boengah, kema jang doeloean letaknja ada sanget berdeketan sama baginda keizer poenja astana di mana baginda keizer tidoer. Sekarang, apa Siangya maoe preksa doeloe itoe orang-orang jang akoe bawa atawa maoe pergi preksa doeloe tempat itoe tempat katjoerian ?”
