FATSAL XVIII.
Itoe orang-orang teroes balik kombali ka Khay-hong-hoe dan rapportken pada Pauw Kong apa jang soeda terdjadi. Sasoedanja itoe iaorang bitjaraken siapa jang moesti poelang dan siapa jang moesti tinggal di Khay-hong-hoe. In-tiong-ho, Goei Tjin maoe poelang ka gredjanja dan djalan sendirian. Say-tjoe-kiat, Sim Tiong Goan, See Liong, Beng Khay, Tjianw Tjia, Han Tjiang, Han Thian dan Ngai Houw, semoewanja maoe balik poelang ka Go-houw-kauw; Han Thian Kim dan Ngai Houw boewat beresken iaorang poenja oeroesan menikah. Teng Tiauw Lan dan Teng Tiauw Hoei bersama Louw Hong dan Louw Tien dan laen-laennja pergi ka Pek-hwa-nia boewat mengoeroes Louw Tien poenja perkara menikah.
Tji Liang mengikoeti ajahnja balik poelang ka Kie-koan bilangan Sansee boewat sembajangan pada koeboeran leloehoernja. Orang jang laen-laennja djoega pada poelang ka masing-masing poenja kampoeng kalahiran boewat sembajangin marika poenja leloehoer. Tjoema Tjhio Peng dan Tian Tjiauw, lantaran marika poenja koelawarga berdiam di kota radja, maka iaorang tida pergi ka mana-mana, begitoe poen Heng Djoe Liong dan Heng Djoe Houw, kerna tida ada kaperloeannja djadi iaorang tinggal teroes dalem kota radja.
Tjhio Peng telah menjanggoepin boewat mengambil maitnja marika berdoewa poenja ajah dari gedongnja Bang Tay-soe tjari soeatoe tempat jang baek boewat mengoeboer maitnja Heng Kit itoe.
„Pang Loya, kaoe bagimana?” menanja Tjhio Peng pada Pang Jan.
„Akoe tida ada koeboeran jang boleh ditjari,” djawab orang jang ditanja.
„Hei, apa kaoe tida mempoenjai koeboeran dari kaoe poenja leloehoer?”
„Akoe tida taoe di mana letaknja,” manerangken Pang Jan. „Sebab sadari moeda sekali akoe poenja kadoewa orang
