―167―
wasiat jang sanget berharga," kata Pang Jan. "Akoe harep sadja nona soeka kaloewarken dan kasi liat padakoe."
Lou So Tjin pikir, sekarang ia soeda mendjadi soewami-istri sama Pang Jan, tentoe sadja tida ada halangannja kasi ia liat itoe wasiat. Laloe ia menghamperi satoe peti dan lantas ia boeka selotnja. Di laen fihak, Pang Jan dengen poera-poera bilang gerah, lantas sadja melepasken iapoenja badjoe pandjang. la liat itoe randjang kamanten memake klamboe dari soetra idjo, jang itoe waktoe disangketin pada sapasang sangketan dari emas. Di dalem pembaringan ada teratoer bantal-bantal jang memake saroeng soelam dan sprei baroe jang bresi, sedang hawanja sangat haroem sabagi djoega dalem kajangan.
Di dekat klamboe ada tergantoeng satoe pedang, jang depan blakangnja tadjam dan memake satoe saroeng dari koelit ikan tjoetjoet, ditimpalin sama rombe-rombe jang berwarna koening. Sedang di atas satoe tembok ada tergantoeng satoe golok. Pang Jan perhatikan, itoe semoewa dengen terliti, agar kamoedian djika ia maoe ambil djadi gampang. Itoe waktoe Lou So Tjin soeda ambil kaloewar itoe salampe aneh dari peti dan berkata: "Siangkong, djangan kena tjioem baoenja..."
Pang Jan satelah meliat itoe barang, dengen tida sabaran lagi lantas sadja angsoerken sabelah tangannja boewat merampas. Lou So Tjin tarik kombali tangannja jang soeda saparo diangsoerken, sembari moendoer satoe doewa tindak ka blakang. Itoe waktoe djoega iapoenja halis dikeroetken dan kadoewa matanja mengawasi dengen tetap pada Pang Jan.
,,Ach, apa barangkali siangkong maen gila
