— 236 —
Maka apabila kita tida lebih siang bikin persediahan, sampe pada waktoenja maoe brangkat mati, baroelah kita aken mendjadi njesal.“
„Ach, kaoe djangan omong segala gila-gila,“ menjentak Tjiong Hiong. „Djika menoeroet discipline kaoe poenja perboewatan sekarang, ada satoe kadosahan jang hendak membikin kaloet hatinja pasoekan. Hati-hati, djangan sampe terpaksa akoe djalanken atoeran militair.“
„Apabila kaoe tida maoe pertjaja akoe poenja omongan.“ kata lagi Ie Sia jang membatoe teroes, „akoe sanget koewatir biar poen bertemoe moeka pada baginda keizer djoega tida bisa. Maka menoeroet akoe poenja pikiran lebih baek kita terbitken satoe kaonaran, soepaja kita di-ikat boewat dibawa mengadep pada baginda keizer. Itoe waktoe biar poen kita moesti dipanggal batang leher djoega, kita bisa brangkat mati dengen mata meram, sebab soeda mengalamken berhadep-hadepan sama baginda keizer.“
„Kaloe kaoe teroesken kaoe poenja omongan gila,“ kata Tjiong Hiong, „sekarang djoega akoe lantas ringkoes pada kaoe.“
Ie Sia tida brani bitjara lagi ; tapi dalem hatinja lebih siang ia soeda menjimpen satoe niatan. Dengen perlahan ia mendekati ka pintoenja itoe taman boengah. Sabagitoe lekas ia sampe di sitoe dengen keras ta berseroeh wan ong. Ie Gie djadi sanget terpandjat dan dengen tjepat memboeroe padanja. Ia tendang soedaranja sampe kadjoengkel, kamoedian ia minta tambang pada iapoenja pengikoet dan lantas ikat Ie Sia sabagi djoega mengikat satoe samseng. Blakangan Tjiong Hiong dan Ie Gie poen pasrahken diri sembari taro marika poenja kadoewa tangan di blakangnja bersedia boewat diringkoes.
„Tjhio taydjin,“ kata Tjiong Hiong. „akoe harep kaoe soeka meringkoes pada kita berdoewa, kamoedian menoenggoe prentahnja baginda keizer.“
„Saorang jang berboewat saoerang jang moesti tanggoeng,“ kata Tjhio Peng, „kaoe berdoewa sama-sekali tida tersang-
