— 235 —
masing-masing poenja ilmoe kapandean, itoe semoewa dari sabelah dalem tida brentinja dikabarken ka loewar, malah pada sasoedanja mempertoendjoekin ilmoe kapandean dan dikoerniaken pangkat, dengen lekas orang di sabelah loewar mendapet taoe hal itoe. Biar poen Han Tjiang jang tadinja begitoe berkoewatir atas dirinja iapoenja anak-angkat, Han Thian Kim, satelah mendenger kabar dikoerniaken djabatan Tjan-tian Tjiangkoen, hatinja djadi merasa sanget girang dan semoewa orang pada hatoerken slamat padanja.
„Orang goblok toch ada mempoenjai redjeki njasar,“ kata Tjhio Peng. „Memang djoega orang poenja redjeki soeda takdirnja Thian dan tida bisa salah lagi.“
Itoe waktoe Ie Sia lantas berkata pada Tjiong Hiong : „Apa kaoe bisa tebak apa maksoednja ini oeroesan ?“
„Maksoed oeroesan apa ?“ menanja Tjiong Hiong.
„Djangan kira kaoe orang sekolahan dikataken perkiran loewas,“ kata lagi Ie Sia : „tapi akoe bisa tebak maksoednja kita poenja oeroesan.“
„Maksoed oeroesan apa sih ?“ menegasken Tjiong Hiong.
„Boekantah kita orang telah ditrima menaloek ?“
„Ja, batoel begitoe.“
„Tapi menoeroet akoe poenja pengrasahan itoe penerimahan menaloek boekannja dengen sasoenggoe hati, hanja iaorang pantjing kita orang masoek ka kota radja kamoedian iaorang maoe binasaken kita poenja djiwa.“
„Omong kosong !“ menjentak Tjiong Hiong. „Apa kaoe mengarti maksoednja itoe perkatahan jang kaoe oetjapken ?“
„Apabila kaoe orang tida maoe pertjaja, akoe koewatir pada waktoe kaoe maoe menjesal soeda djadi kasep. Sebab kaloe kenar kita ditrima menaloek, mengapa kita orang tida dikasi koenia djabatan negri seperti jang laen-laennja ?“
„Nanti apabila laen-laennja soeda mendapet gilirannja, baroelah sampe pada kita poenja giliran.“
„Akoe rasa itoe waktoe kita orang aken mendapet giliran boewat ditabas batang leher. Itoelah sasoenggoenja boekan perkara jang enak. Melak-melak kita kena diakalin orang.“
