— 230 —
berkerekan dan Tan Lim toendoekin kapalanja, meliat, ka bawah, ternjata itoe permadani jang digelar di atas djoebin telah berlobang di sapoeloeh tempat. Lantaran apa ia, djadi taoe bahoewa ini orang poenja tenaga sasoenggoenja tida ketjil,
„Hei, masatah kaoe sama-sekali tida mempoenjai kapandean satoe apa ?” mendesak lagi Tan Lim.
„Ah, ah, siapa bilang akoe sama-sekali tida mempoenjai ilmoe kapandean satoe apa,” kata Han Thian Kim dengen djengkel. „Na, na, tjoba kaoe liat marika itoe boekannja ada mempoenjai ilmoe kapandean? Tapi akoe bisa tjekel iaorang satoe per satoe dan teroes dilemparken ka atas genteng roemah.”
„Ach, mana boleh oendjoek kapandean dengen tjara begitoe!” menjentak itoe kapala orang kebiri dengen pengrasahan djengkel.
„Habis bagimana baeknja ?” kata Han Thian Kim dengen bingoeng. „Iaorang semoewa aken mendapet pangkat, tjoema akoe sadja jang tida kabagian.”
Bitjara sampe di sini ia liat itoe lankan jang terbikin dari batoe poetih dan menambahken lagi: „Akoe bisa bikin antjoer itoe lankan batoe.”
„Ai, itoelah tida boleh, anak gelo,” kata Tan Lim. „Meroesakin barang dalem tempat terlarang, apa kaoe taoe bakal mendapet hoekoeman apa ?”
Djoestroe pada waktoe iaorang bitjara dengen belon mendapet kaberesan, sabaliknja baginda keizer jang telah dapetken satoe pikiran. Baginda poen merasa sanget soesa sama oeroesannja Han Thian Kim, dengen tida sengadja baginda tjendorongken toeboenja meliat ka sabelah kiri dan kanannja itoe paseban. Ini Liong-tou-kok terletak di sabelah Barat dan menghadep ka Timoer, sedeng itoe roewangan jang didiamin oleh baginda keizer di itoe waktoe lebarnja ada lima petakan dan pandjangnja limabelas petakan. Di sabelah Selatan Oetaranja itoe paseban ada doewa bangkoe batoe, di atas mana ada ditaro doewa „Teng” (samatjem koewali jang memake tiga kaki) besi.
