— 229 —
Terpaksa Han Thian Kim moesti mendekam lagi sebagimana doeloean; tapi sabagitoe lekas Tan Lim berlalo, kombali ia mengangkat badan sambi mengoesoet-ngoesoet peroet dan memandang pada baginda keizer. Tapi sabaliknja keizer Song Djin Tjong tida djadi goesar, sebab mengetahoei bahoewa ia itoe ada saorang kasar dan goblok. Dari sebab dalam daftar ada diseboet ia mempoenjai ilmu kapandean apa-apa, salaennja diseboet bertenaga besar, djadi tida taoe moesti menjoeroe ia pertoendjoekin kapandean bagaimana. Maka lantas kasi prentah Han Thian Kim boleh mempertendjoekin iapoenja kapandean dengan merdika, jaitoe menoeroet apa jang ia rasa baek. Tan Lim lantas menghampiri pada Han Thian Kim dan berkata: „Baginda keizer soeroe kaoe pertendjoekin ilmu kapandean.”
„Pertendjoekin ilmu kapandean apa?” balik menanja si Goblok.
„Akoe mana tao kaoe ada mempoenjai ilmu kapandean apa,” kata Tan Lim. „Tapi sabetoelnja kaoe ada mempoenjai ilmoe kapandean apa?”
„Akoe bisa makan nasi,” kata si Goblok.
„Djangang omong sembarangan,” menjentak itoe kapala orang kebiri. „Akoe tanja kaoe ada mempoenjai ilmu kapandean apa?”
„Akoe bisa membegal orang di tengah djalanan,” kata Han Thian Kim.
„Ach, apa kaoe bilang? Beroentoeng terpisa sama baginda keizer djaoe djoega, kaloe sampe kadengeran apa jang kaoe kataken, nistjaja kaoe bakal mendapat marah besar dari baginda keizer.” Pada sasoedanja merandek sebentaran kombali ia menambahken: „Tida perdoeli kaoe ada mempoenjai kapandean apa djoga, kaoe boleh tjoba kasi oendjoek, soepaja kaoe poen bisa mendapet pangkat; kaloe tida, laen-laen orang mendapet pangkat, tentoe tjoema kaoe sendiri jang tida.”
Han Thian Kim setelah mendengarkan itoe omongän, hatinja merasa sanget iboek. Itoe waktu kadengeran soewara jang
