— 223 —
FATSAL XIV.
Baginda Song Djin Tjong kasi prentah bahoewa Louw Tien boleh lantas moelai bersilat. Itoe anak moeda poen menoeroet toeladannja iapoenja twako, manjaboet pedangnja dari sabelah blakang. Louw Tien poenja ilmoe silat pedang ia dapet perladjarken dari Teng Tiauw Hoei. Dasaran iapoenja otak sanget tadjem, dengen sasoenggoenja djoega ia soeda bisa dapet peladjarken ilmoe kapandeannja iapoenja goeroe, jang sekarang ia boleh pertoendjoekin dengen bangga di hadepannja baginda keizer. Bermoela iapoenja pedang dimaenken sadjoeroes, tapi blakang samingkin lama djadi samingkin tjepat, hingga kaliatannja sabagi djoega soeatoe toempoekan pedang, sabagi satoe rante besi jang mengiterin sakoedjoer badannja itoe orang jang bersilat.
Baginda keizer bersama semoewa orang jang tida menjaksiken tida ada satoe jang tida memoedji. Pada sasoedanja Louw Tien bersilat sampe di achirnja, ia poen berloetoet kombali di tempatnja tadi. Moekanja poen tida berobah dan napasnja tida memboeroe.
Kamoedian baginda keizer prentahken Ngai Houw pertoendjoekin iapoenja ilmoe kapandean silat tangan kosong. Itoe waktoe ia ada memake pakean serba idjo gelap, toeboenja biar poen tida tinggi, tapi potongannja sanget keren dan garang. Halisnja gomplok, idoeng mantjoeng, moeloet lebar dan toeboenja tegap dan pasek.
Baginda keizer sasoedanja meliat ia itoe poenja roman lantas kasi prentah boewat moelai. Kombali Tan Lim jang kasi taoe pada itoe anak moeda.
Lantaran ia tida perloe memake sendjata apa-apa, dalem saät itoe djoega ia moelai goeloeng tangan badjoenja dan selitken badjoenja pasa iapoenja tali pinggang. Dengen sakoenjoeng-koenjoeng ia berlompat sampe sapoeloeh kaki tingginja, kamoedian ia berdiri dengen tegar, tida berbeda sebagi sikep soeatoe koetjing, sedikit poen tida kadengeran soewara kakinja. Pada sasoedanja ia bersilat, ia poen ber-
