— 222 —
dibatjokin, ditoesoekin, diserampangin dan disabetken. Dari sebab di latarannja itoe Liong-tou-kok ada digelari permadani, pada waktoe itoe anak moeda berlompat pergi-dateng, kakinja sama-sekali tida bersoewara koetika mengindjak boemi. Pada sasoedanja ia bersilat sampe di achirnja, iapoenja napas tida memboeroe dan iapoenja moeka tida djadi berobah, kamoedian dengen sabar ia lantas berloetoet lagi di tempat tadi.
„Sasoenggoenja djoega tida katjiwa sebagi toeroenannja satoe panglima perang,” kata keizer Song Djin Tjong.
Kamoedian ia liat namanja Louw Tien jang terseboet bisa bersilat sama sendjata pedang. Itoe anak moeda poen disoeroe lempangken toeboenja, ternjata ia ada satoe pamoeda tjakep dalem pakean jang berwarna kembang trate, biarpoen langsing tapi ada sampe pasek dan gagah. Baginda keizer poen lantas kasi prentah soepaja itoe anak moeda mempertoendjoekin iapoenja ilmoe kapandean.
„Baginda keizer prentah kaoe pertoendjoekin kaoe poenja ilmoe silat pedang.” kata Tan Lim jang menghamperi pada Louw Tien.
Itoe anak moeda kasi taoe bahoewa iapoenja pedang ada di loewar taman, jang lantas disoeroe pergi ambil. Pada sasoedanja dikasi toendjoek doeloe pada baginda keizer sabagimana doeloean, baroelah ditrimaken pada itoe anak moeda.
