— 221 —
Tan Lim lantas soeroe salah-satoe orang kebiri pergi ambil itoe golok. Tida antara lama itoe taykam soeda balik kombali dengen membawa itoe sedjata, jang lantas dipasrahken pada Tan Tjongkwan, orang siapa lantas semboeti dan berloetoet di soeatoe tempat jang sedikit djaoeh dari medjanja keizer, kamoedian ia angkat itoe golok ka atas dengen kadoewa tangannja boewat dtpreksa. Sasoedanja itoe, Tan Lim lantas trimaken itoe golok pada Pek In Seng.
„Akoe terpaksa moesti berlakoe koerang hormat dihadepannja baginda keizer,” kata ia pada itoe kapala orang kebiri.
„Berlakoe koerang hormat bagimana ?” menegesken itoe kapala taykam.
„Akoe moesti goeloengken akoe poenja tangan badjoe dan selitken ka atas akoe poenja badjoe. baroelah akoe bisa bersilat dengen laloewasa.”
„Itoelah tida ada halangannja, sebab kaloe boekannja begitoe kaoe poen tida bisa pertoendjoeken kaoe poenja ilmoe kapandean. Sekarang kaoe boleh lantas moelai.”
Pek In Seng lantas goeloeng kadoewa tangan badjoenja dan selitken badjoenja ka iapoenja tali pinggang. Itoe golok ia soeroeng ka blakang dan lantas mendjoera, berbareng dengen itoe, kadoewa tangannja ditaro ka blakangnja, jang kiri mamegang saroengnja itoe sendjata, sedeng jang kanan mamegang gagangnja itoe golok, kamoedian ia goenaken satoe tipoe jang dinamaken „Yauw-tjoe-hwan-sin,” meniroe perboeatannja satoe alap-alap balikin badannja naik terbang ka atas. Baginda keizer tjoema meliat sadja itoe anak moeda berloetoet di sitoe, koenjoeng-koenjoeng ia berlompat ka atas dan dalem tangannja soeda mamegang satoe golok jang terhoenoes, tapi tida kataoean tjara bagimana menjaboet golok itoe kaloewar dari saroengnja.
Pek In Seng lantas moelai bersilat sama iapoenja golok dengen soenggoe-soenggoe. Ternjata iapoenja ilmoe silat golok ada sanget bagoes. Itoe sendjata sabentar ka depan sabentar ka blakang, kiri, kanan, atas, dan bawah, dengen bergantian
