— 220 —
kamoedian itoe lima orang soeda dibawa dateng mengadep. Tan Lim kasi tanda soepaja Pek In Seng berloetoet dan djalanken peradatan sabagimana moestinja. Tapi ini lima orang boekannja berloetoet dengen berdjedjer seperti jang doeloean hanja satoe per satoe berentet satoe dengen dari depan teroes lempeng ka blakang.
Itoe semoewa ada atas maoenja Tjhio Peng. Ia sengadja taro orang jang romannja djelek di sabelah blakang. Baginda keizer lantas kasi prentah soepaja Pek In Seng mengangkat badannja. Itoe anak moeda lantas menoeroet dengen mata meliat ka bawah.
Keizer Song Djin Tjong satelah meliat pada In Seng, lantas djadi terkenang pada kaädahan doeloe hari. Ia djadi dapet inget pada Pek Giok Tong jang dateng menoelis sairan di Liong-tou-kok. Sebab itoe anak moeda poenja roman sedikit banjak ada mirip sama iapoenja paman. Dengen tida merasa lagi baginda keizer mendjadi sedih dan ampir sadja ia menoempahken aer mata. Koetika baginda keizer membatja itoe daftar nama, ia liat gelarannja Pek In Seng ada Giok-bian-siauw-Tjoan-tjoe (Tjoan Tjoe ada namanja saorang gaga di djeman Tjangkok jang berbakti pada orang toewanja). Lantas baginda ksizer taoe bahoewa In Seng ada satoe anak jang berbakti pada iboenja, hal mana soeda membikin baginda keizer mendjadi senang dan soeka. Sebab pribahasa ada bilang : mantri jang setia moesti kaloewar dari koelawarga jang berbakti. Dalem itoe daftar ada diseboetken ia pande menggoenaken golok. Itoe waktoe baginda keizer lantas kasi prentah Pek In Seng tjoba pertoendjoekin iapoenja ilmoe golok.
Tan Lim lantas menghamperi pada itoe anak moeda dan berkata : „Baginda keizer kasi prentah soepaja kaoe pertoendjoekin kaoe poenja ilmoe silat golok.“
Pek IN Seng lantas memandang pada Tan Tjongkwan dan berkata : „Ini waktoe akoe tida membawa sendjata.“
„Kaoe poenja sendjata ada di mana ?“ menanja Tan Lim.
„Ada di sabelah loewar pintoenja ini taman.“
