— 218 —
moewa orang lantas mengangkat badan, tapi tida brani memandang pada keizer dan iaorang poenja mata pada meliatin marika poenja hidoeng sendiri sembari menahan napas. Keizer lantas memandang pada iaorang, itoe waktoe Tan Lim lantas menghamperi boewat menjeboetken iaorang poenja nama satoe per satoe. Sebab lebih doeloe ini kapala orang kabiri soeda tanjaken dengen terang sasoeatoe orang poenja nama.
Keizer Song Djin Tjong moelai liat Pak-hiap jang memake pakean dari soetra oengoe, matanja berwarna blao dan moekanja jang merah memake brewok dan tjambang, hingga iapoenja roman ada banjak mirip sama Tjiong Lie Koan, salah-satoe dewa di antara Patsian. Kamoedian baginda mengawasi pada Goei Tjin, jang memake pakean pertapahan berwarna aboe-aboe, begitoe poen warnanja iapoenja boengkoesan kapala. Koelit moekanja poetih seperti batoe giok, halisnja lemas dan matanja pandjang, di antara bibirnja ada toemboe tiga baris koemis dan djenggot pendek. Sedeng itoe doewa soedara Teng, semoewanja memake pakean jang serba idjo dan memake boengkoesan kapala Boeseng. Iaorang poenja roman poen tjakep dan toeboenja ada bersamahan satoe dengen laen, malah roepanja djoega ada begitoe mirip.
Kamoedian baginda memandang pada See Liong, jang memake pakean soetra berwarna tanah dan boengkoesan kapala jang meroepaken boentoet bebek. Iapoenja moeka sabagi warnanja batoe giok oengoe, sedeng moekanja ada memake koemis dan brewok jang soeda berwarna poetih. Beng Khay memake pakean warna merah dan Tjauw Tjia itam, sedeng Sim Tiong Goan dan Lioe Tjeng doewa-doewanja memake pakean warna biroe, tjoema jang satoe toeboenja koeroes dan jang laen gemoek.
Pada sasoeda baginda keizer meliat marika itoe semoewa dengen terang, kerna taoe iaorang tida maoe mendjabat pakerdjahan negri, maka ia poen tida maoe memaksa. Dikasi prentah pada Pak-hiap, Auw-yang Tjhoen, boewat masoek djadi hweeshio di Tay Siang Kok Sie dan mengangkat goeroe pada Liauw Djian Hweeshio, serta dikasi
