— 216 —
„Tian taydjin dan Tjhio taydjin,“ kata itoe doewa orang. „Siangya soeroe menanjaken apa itoe adat-istiadat boewat mengadep pada baginda keizer soeda diadjarken dan dipahamken sampe mateng ?“
„Soeda,“ djawab Tjhio Peng sembari menggoetken kapala.
Dari dalem ada dibawa kabar, bahoewa baginda keizer soeda menoedjoe ka Liong-tou-kok, diprentahken semoewa orang boleh masoek. Begitoelah Tian Tjiauw dan Tjhio Peng kapalaken itoe semoewa orang masoek ka dalem Hou-tiat-boen, meliwati Tjiauw-tek-boen, Kim-so-boen dan Giok-sek-boen, teroes menoedjoe ka pintoe taman-boenganja keizer. Di sini laen-laennja tida bisa masoek teroes, katjoewali Lam-hiap dan Hwan-kang-tji. Sebab ia berdoewa ada memangkoe djabatan Gie-tjian Sam-pin Hok-wie. Tapi Tian Tjiauw sendiri sadja jang menoenggoe prentah di sabelah bawahnja itoe paseban Liong-tou-kok, sebab Tjhio Peng moesti mengoeroes dan pimpin pada itoe orang-orang.
Pauw Kong lebih siang soeda masoek ka dalem itoe taman boengah dan itoe waktoe djoestroe lagi berdiri di bawah tangga batoenja itoe paseban boewat menoenggoe pada baginda keizer. Tida antara lama kamoedian ada bebrapa banjak orang kebiri jang berdjalan keloewar dari sabelah dalem sembari moeloetnja berseroeh: „Baginda keizer dateng !“ Blakangan ada berdjalan kaloewar dari satoe rombongan dan seperti djoega jang doeloean berseroeh sabagimana tadi. Dan koetika rombongan orang kebiri jang katiga berdjalan kaloewar, iaorang tida brani berseroeh lagi seperti jang doeloean, sebab marika terpisa terlaloe deket pada baginda keizer. Tida antara lama satoe djoli terboeka jang didoedoekin oleh keizer Song Djin Tjong digotong kaloewar. Pauw Kong lantas berloetoet dan medjoera di pinggiran djalanan itoe taman.
„Hamba, Pauw Tjin, mengadep pada djoendjoengan, harep sadja toewan'koe Ban-swee, ban-ban-swee.“
Baginda keizer Song Djin Tjong dalem iapoenja djoli berkata : „Kheng. boleh bangoen berdiri.“
Itoe djoli karadjahan digotong teroes sampe di bawahnja.
