— 214 —
Itoe waktoe lantas soeroean Kong-soen Tjek bikinken marika itoe poenja daftar nama dengen terang, jang dikirimken doeloe ka kraton, kamoedian bawa iaorang menoedjoe ka Hou-liat-boen boewat menoenggoe keizer poenja panggilan. Di sapandjang djalan banjak sekali orang jang mengikoeti, samingkin lama itoe orang-orang jang mengikoeti djadi saminngkin banjak djoemblanja. Di dalem kota radja kaloe ada terdjadi perkara apa sadja, dalem sakedjepan djadi tersiar di antara orang banjak. Begitoelah pendoedoek itoe kota lantaran mendenger kabar orang-orang jang telah mametjahken Tong-bong-tien maoe pergi mengadep pada baginda keizer, lantas sadja pada dateng berkroemoen dan mengikoeti boeat menjaksiken bagimana marika itoe poenja roman. Itoe orang banjak poen mengikoeti sampe di loewarnja Hou-tiat-boen.
Bebrapa orang kebiri jang mendjaga di Hou-tiat-boen, lantaran mendenger soewara orang banjak jang bergoemoeroe lantas pada kaloewar meliat. Koetika meliat pada Tian Tjiauw, Louw Hong, Han Tjiang, Tji Kheng dan Tjhio Peng lantas menghamperi boewat bitjara. Begitoelah satoe sama laen pada djalanken kahormatan sabagimana lajiknja. Tatkala itoe orang-orang masoek, itoe orang-orang kebiri lantaran merasa ingin taoe, menanjaken iaorang poenja nama satoe per satoe.
„Wah, sabentar bila iaorang mengadep pada baginda keizer,” kata salah-satoe antaranja, „akoe tanggoeng iaorang bakal dikoerniaken djabatan negri. Nanti kaoe orang kaloewar lagi, kita maoe hatoerken slamet pada kaoe orang semoewa.”
Djoestroe pada waktoe orang lagi omong-omong, dari sabelah dalem ada berdjalan kaloewar doewa taykam ketjil, semoewanja beroemoer antara toedjoebelas sampe sembilan belas tahon, dalem iaorang poenja costuum jang telah ditetapken sedeng iaorang poenja roman semoewanja tjakep dan ampir tida berbeda sebagi anak prawan. Di iaorang poenja, tangan mamegang keboetan dari boeloe boentoet koeda, jang dikeboetken sana kamari, di laen fihak moeloetnja berseroeh.
