SIAUW NGO GIE.
Bagian ka-doea.
atawa
Pembrontakannja Siang Yang Ong.
――――――――
,,Boekannja akoe terlaloe marendah," kata Pang Jan. ,,Sabetoelnja nona poenja ilmoe kapandean djangan kata di antara bangsa prampoewan, sekali poen bangsa lelaki di seantero doenia, soeker ditjari kadoewanja. Akoe tida brani membilang soeda perna mendapet pengadjarannja goeroe jang ternama, tapi kapandean di atas koeda, di moeka boemi, berlompat tinggi dan menggoenaken delapan belas roepa sendjata, sedikitnja akoe paham djoega, dan bebrapa banjak panglima dalem Ong-hoe, tida ada satoe jang bisa tandingin akoe; tapi sekarang koetika berhadepan sama nona, belon berdjalan bebrapa djoeroesan, lantas sadja kaoe soeda bisa bikin akoe djadi tida bersendjata, kamoedian dengen tida taoe apa sebabnja akoe soeda djato meloso dalem keadahan pangsan...."
Lou So Tjin koetika mendenger sampe di sini, lantas sadja berkikikan tertawa geli. ,,Djika pada waktoe bertanding pikiran djadi gelap, tentoe sadja moesti djato," kata ia dengen manis.
,,Masi ada soeatoe hal jang akoe ingin menanjaken pada nona," kata lagi Pang Jan. ,,Itoe sendjata resia jang nona goenaken boewat meroeboeken akoe poenja kawan ada sendjata resia apa? Sebab akoe tida meliat satoe apa, tapi sabaliknja kawankoe itoe lantas sadja djato pang-
11
