— 205 —
kata Tjhio Peng jang manggoet-manggoetken kapala oendjoek satoedjoenja.
„Tjiong Hiong di Koensan telah membawa brapa banjak orang?” menanja lagi Pauw Kong.
„Tjiong Hiong dari Koensan tjoema membawa doewa orang, manerangken Tjhio Peng sedeng jang laen-laennja ada iaorang poenja pengikoet.”
Pauw Kong pesen soeroe Tjhio Peng bawa itoe tiga orang dari Koensan dateng mengadep padanja dan bawa Heng Djoe Liong dan soedara moedanja pergi mengadep pada Gan Sin Bin di Tay Siang Kok Sie. Sasampenja Hoan-kang-tjie kasi taoe apa jang baroesan Pauw Kong soeda bitjaraken. Itoe doewa soedara Heng lantas berloetoet di hadepan Gan Sin Bin memoehoen itoe ambtenaar poenja kamoerahan hati. Gan Sin Bin manggoetken kapalanja dan soeroe itoe doewa orang berbangkit. Tjhio Peng kasi taoe djoega bahoewa Pauw Kong soeroe ia bawa Tjiong Hiong dan doewa kawannja mengadep ka Khay-hong-hoe, soeda tentoe sadja diloeloesken.
Tjhio Peng adjak Tjiong Hiong, le Sia dan le Gie sampe di sabelah loewar kamar boekoenja Pauw Kong dan pada sasoedanja ia kasi taoe bahoewa itoe tiga orang sekarang soeda menoenggoe di loewar, baroelah ia adjak marika itoe masoek teroes ka dalem itoe kamar batja. Itoe tiga orang lantas berloetoet dan mendjoera di hadepannja itoe minister, jang soeroe itoe tiga orang mengangkat masing-masing poenja kapala.
Menoeroet Pauw Kong poenja doegahan, Tjiong Hiong jang mandjadi kapala dari Koensan dan mempoenjai doewapoe- loeh ampat benteng-benteng darat dan aer, tentoelah ada saorang jang moekanja garang dan bengis. Sebab orang jang beroman begitoe sadja baroe bisa mempoenjai tjoekoep pengaroeh boewat mendjadi kapala dari satoe goenoeng jang loewasnja delapan ratoes lie pasegi. Tapi sekarang satelah ia meliat sendiri romannja itoe Tjee-tjoe, dengen tida merasa lagi hatinja djadi merasa heran. Sebab iapoenja paras moeka
