Tida berselang beberapa hari, Pek Ngo-thay-thay bersama iapoenja poetra toenggal jang masih moedja, Pek Hoen Soei soeda dateng dan lantas bikin sembajang di itoe tetarep. Gan Sin Bin katemoekan Pek hoedjin dan memboedjoek dengan perkataan manis, serta peringetken soepaja pimpin Pek kongtjoe sekola dengan betoel, soepaja kamoedian bisa mendjadi orang jang ternama. Blakangan ia soeroe antjerken sadjoembila oewang boewat onkost sembajang. Bergitoelah Pek hoedjin lantas brangkat membawa djinazatnja iapoenja soewami, jang aker dikoeboer di iapoenja kampoeng kalahiran.
Gan Sin Bin poen lantas brangkat poelang ka kota radja. Semoea ambtenaar civiel dan militair di itoe kota pada menganter dan sediakan segala kandjaraan jang perloe. Sedeng orang-orang jang toeroet menbantoe bikin petjah Tong-bong-tien, semoewa mengiring pada itoe ambtenaar. Tjiong Hiong dari Koensan bersama Ie Gie dan Ie Sia bawa iaorang poenja balatentara poelang ka goenoenganja. Itoe semoewa ambtenaar dari kota Siangyang kombali. Di hari jang berikoetnja, Tjhio Peng atoer orang-orang mendjadi tiga rombongan. Rombongan pertama, Tian Tjiauw, Goei Tjin, Tji Kheng, Louw Hong, See Liong, Beng Khay, Tjiauw Tjia bersama Kong-soen-tjek djalan doeloan ; sedeng Gan Sin Bin dalem iapoenja djoli kabesaran dianter oleh djago-djago moeda, seperti Tji Liang, Pek In Seng, Him Wie, Han Liang, Pek Giok dan Han Thian Kim, koetika iaroeng lagi berdjalan sampe di satoe rawah jang banjak alang-alangnja, mendadak ada berlompat kaloewar satoe orang ka djoeroesan djolinja Gan Sin Bin, jang lantas menoesoek sama iapoenja satoe golok terhoenoes.
