— 195 —
sendok aer tadjin. Tjoema sadja lantaran soeda terlalu lama roepanja Peh Khi tida bisa telan lagi itoe aer tadjin, tapi kita orang tida brani angkat itoe obat dari kapalanja. Ini hari kita dapet kanjataan toeboenja itoe orang soeda dingin seperti ijis dan kakoe sakali, djogea satoe mait. Oleh kerna itoe, kita lantas braniken hati boewat mengangkat itoe bie-hoen-yo-phia jang ditaro di atas emboen-emboenannja, tapi ternjata soeda kasep, sebab lebih siang ia soeda poetoes djiwa. Kita orang tida brani melantjang mengoeboer, maka sekarang dateng mengadep minta tajdjin poenja prentah.”
Gan Sin Bin lantas mengelah napas pandjang dan berkata: „Sajang, sajang sekali, sebab dengan begitoe ia djadi bisa terlepas dari hoekoemannja negri. Kaoe bedoewa djangan ka mana-mana, nanti ikoet akoe masoek ka kota radja boewat menoenggoe firman keizer dan menerima djabatan negri.”
Kamoedian Gan Sin Bin prentah bebrapa orang sabawahannja pergi ka Tan-khie-bong boewat mengambil maitnja Peh Khi dan disoeroe diboewang di antara djoerang goenoeng-goenoeng soepaja dimakanin boewat boeroen-boeroeng dan oeloeng-oeloeng. Koetika itoe doewa orang maoe brangkat sama itoe orang-orang soeroehannja Gan Sin Bin, Tjhio Peng lantas menjegat dan minta kombali itoe obat Bie-hoen-yo-piah, jang lantas dikasiken oleh Louw Eng.
Kamoedian ada dateng masoek satoe penggawe mengasi taoe pada Kong-soen Tjek, oleh siapa dirapportkee pada Gan Sin Bin, bahoewa Pek Ngo-thay-thay menerima firman keizer boewat mengambli djinazatnja Pek Gioek Tong, jang tersimpan di dalem itoe goetji porcelein koena, tida lama lagi tentoe bakal sampe ka sini. Gan Sin Bin lantas prentah pada tikoan boeat diriken satoe tetarep di sabelah loewarnja kantoor An-ie, dimana ditaro itoe goetji jang berisi djinazat dengan disembajangin dan mengandoeng bebrapa banjak hweeshio dan saykong boewat batjaken kitab soeji.
Kamoedian Gan Sin Bin mengepalai semoewa ambtenaar civiel dan militair bikin sembajangan pada djinazatnja itoe orang gagah.
