— 192 —
Tian Tjiauw dan ampir dengen berbareng iaorang berkata : „Kita orang semoewa kenal pada Tian taydjin dan maoe menoeroet taydjin poenja segala prentah."
,,Nah, kaloe begitoe akoe maoe talangin kasi prentah atas namanja kaoe orang poenja taydjin," kata lagi Tian Tjiauw.
,,Ini kawanan pendjahat, jang masi idoep dan mendapet loeka, semoewanja moesti dibawa ka kantoor, berikoet djoega ini doewa pendjahat jang mendjadi kapala, orang siapa kamoemoedian kita orang maoe bawa ka kota radja. Sedeng marika jang soeda tiwas djiwanja, boleh soeroe kapala kampoeng panggilin koeli-koeli boewat dikoeboer."
Pada sasoedanja Tian Him Hoei mamerentah, Kong-soen Tjek dan itoe kawanan pengikoet jang menoenggoe di sabelah sana soeda pada dateng menghamperi. Tida lama kamoedian Yo Peng Boen Tjongpeng djoega soeda djadi sedar betoel dan lantas djalanken peradatan pada orang banjak. Tian Tjiauw kasi taoe, bahoewa baroesan ia soeda toeloeng atoerken apa jang perloe. Yo Tjongpeng manggoetken kapalanja menjataken setoedjoe.
,,Akoe rasa lebih baek taydjin sekalian sadja beslag gemoewa barang miliknja Lou Khay," kata lagi Tian Him Hoei
,,Apabila masi ada orang-orangnja jang katinggalan moesti ditangkep semoewanja dan dibawa ka kantoor boewat didenger iaorang poenja katerangan."
Yo Boen Peng lantas mengepalai iapoenja pasoekan soldadoe pergi ka roemahnja Lou Khay boewat melakoeken itoe pembeslaghan. Di laen fihak Tian Tjiauw dan laen-laennja menoedjoe ka kantoornja itoe Tjongpeng dan kira langit soeda mendjadi terang. baroelah Yo Tjongpeng balik poelang. la kasiken pada Tian Tjiauw staat dari barang-barangang dibeslag, jang aken diteroesken pada Khay-hong- hoe; tapi semoewa orang dalem roemahnja Lou Khay soeda pada maboer djadi tida ada jang bisa tertangkep lagi.
,,Itoelah tida perloe ditjari lebih djaoe," kata Tian Him Hoei. „Akoe harep sadja taydjin soeka soeroe orang sediaken satoe kreta pendjara jang aken digoenaken boe-
