― 186 ―
„Awas, semoewa orang moesti berdiri di djoeroesan Barat-oetara !” memperingetken lagi Pang Jan.
Lou So Tjin djadi mati akal dan tida bisa goenaken lagi iapoenja ngo-sek-bie-hoen-pee. Ia memboeroe pada itoe kawanan soldadoe jang menggendong Yo Tjongpeng dan menggotong Kee Sian, tapi lebih siang ia soeda ditjegat oleh Ngai Houw. Begitoelah iaorang lantas bertempoer dengen seroeh dan sama-sama pandenja, hingga tida kataoean siapa jang lebih koewat.
Itoe waktoe, Lou Khay dan orang-orangnja, biar poen tida semoewanja kena ditangkep oleh balatentara negri, tapi katinggalan tida brapa belas orang sadja dan koetika meliat kaadahan djadi samingkin tida baek, iaorang poen tida brani bikin perlawanan lebih djaoe, hanja pada lari saraboetan menerobos kaloewar kepoengan. Lou Khay dan Tjoei Liong meliat orang-orangnja soeda tida katinggalan barang satoe soeda tentoe sadja hatinja merasa sanget takoet. Pertama Tjoei Liong jang mentjari koetika boewat merat. Ia membatjok ka djoeroesannja Liong Tho, tapi ampir dalem sa'at itoe djoega ia tarik poelang sendjatanja dan balikin badannja merat ka djoeroesan Selatan.
Sapandjang lari Tjoei Liong teroes berpikir, samingkin pikir ia djadi samingkin katakoetan. Djangan kata ia dan kawannja tida bisa menang bertanding sama Pang Jan dan kawan-kawanja, tentoe sadja Lou Khay tida nanti bisa mengampoenin padanja, sebab ia soeda terbitken kaonaran jang boekan ketjil berhoeboeng sama iapoenja perboewatan jang tjomblangin Pang Jan pada Lou So Tjin; tapi taro kata via dan kawan-kawannja bisa beroleh kamenangan, toch ia tida ada itoe moeka boewat bertemoe lagi sama Lou Khay. Menoeroet keadahan di ini waktoe, biar poen ia menggorok leher sendiri djoega, ia tida nanti bisa teboes dosanja pada familie Lou. Tida ada lagi laen djalan selaennja ia moesti maboer ka tempat djaoe.
Itoe waktoe ia katemoeken bebrapa soldadoe jang menjegat iapoenja djalanan, ia lantas ajoen goloknja dan bikin
