― 185 ―
Kioe-bwee-sian-ho poenja ngo-sek-bie-hoen-pee sanget lihaya
Lou So Tjin jang dari satadian masi belon bisa meloekai djoega pada lawanannja sedang, iapoenja salampe adjaib poen tida bisa mendapet koetika boewat digoenaken, sebab selamanja diperingetken oleh iapoenja soewami" itoe. Sekarang ia meliat Yo Tjongpeng menjegat di djoeroesan Timoer-sela-tan dengen tida menghilangken lagi tempo, ia lantas kaloewarken iapoenja salampe aneh dan dikeboetken ka djoeroesannja itoe pembesar militair. Dalem sa'at itoe djoega, Tjongpeng mengaloewarken satoe treakan dan teroes roeboe ka moeka boemi dalem keadahan pangsan, dan iapoenja toembak djoega lantas terlepas dari tangannja. Kim-kak-lok, Kee Sian, koetika menoleh dan dapet liat Yo Tjongpeng roeboe, lantas sadja balikin badannja dan mengajoen iapoenja golok bersedia boewat membatjok. Tapi dalem sa at itoe djoega kadengeran banjak orang pada berseroeh: Tjongpeng taydjin soeda roeboeh !"
Pang Jan meliat itoe bahaja hatinja sanget iboek dan moeloetnja tida brentinja menjomel: Akoe soeda bilang kaoe dateng ka sini, mengapa kaoe tida maoe denger orang poenja advies !" Tapi ia tjoema bisa menggroetoe dan tida bisa berboewat satoe apa boewat membri pertoeloengan. Berbareng dengen itoe, Yauw Beng poen soeda dapet liat itoe bahaja dan ia taoe kaloe maoe pergi menoeloengin tentoe tida kaboeroe. la lantas inget sama iapoenja tempoeling, dengen tjepat ia ambil satoe dan timpoekin ka djoerpesannja Kee Sian. Ampir dalem sa'at itoe djoega Kim-kak-lok mengaloewarken satoe treakan sakit dan lantas roeboe di dekatnja itoe officier, sebab iapoenja sabelah poendak soeda tertantjap oleh Yauw Beng poenja tempoeling.
Semoewa soldadoe pada memboeroe boewat membri pertoeloengan pada iapoenja officier, sekalian iaorang lantas ringkoes pada Kee Sian jang speda tida berdaja lantaran loekanja. Kamoedian dengen lekas iaorang gotong itoe doewa orang ka djoeroesan Barat-oetara, sebab takoet sama Lou So Tjin poenja salampe aneh.
