— 179 —
lagi berdjalan masoek ka dalem satoe rimba ketjil, koenjoeng-koenjoeng ia liat dari seblah Oetara ada mendatengin saorang dengen berlari-lari. Lantaran ia tida kenalin orang ada Pang Jan, lebih doeloe ia menoenggoe sembari berdjongkok, dan koetika Pang Jan liwat di hadepannja, dengen tjepat ia lantas menendang dan pada sasoedanja itoe orang jang ia tendang djato dan tjaboet goloknja boewat membatjok. la kenalin orang itoe ada Pang Jan.
„Ach, kiranja Pang Toako,” kata ia.
„Siapa?” menanja Pang Jan dengen girang.
„Akoe, Ngai Houw.”
„Ai kaoe soeda membikin akoe djadi kaget sangat terkedjoet dan soemangatkoe terbang saparo. Ini waktoe akoe tida bisa membri katerangan banjak pada kaoe, dan marilah kita pergi menangkap kawanan pendjahat....”
Djoestroe pada itoe waktoe Louw Tien poen soeda sampe.
„Louw Hiante,” kata Pang Jan, Ngai Hiante ada di sini.
„Sekarang kita bertiga ada sampe tjoekoep boeat lawan itoe kawanan pendjahat.”
„Apa itoe prampoewan poenja barang aneh kaoe soeda beroentoeng dapet ambil ?” menanja Louw Tien,
„Saoepamanja akoe soeda bisa dapet ambil, tentoelah akoe tida nanti lari,” kata Pang Jan.
„Kaoe ini sasoenggoenja tida ada goenanja sama-sekali,” kata Louw Tien. „Pada sasoedanja memboewang begitoe banjak tenaga dan pikiran, toch achirnja tida membawa hasil satoe apa.”
„Barang apa sih?” menjelak Ngai Houw, jang merasa ingin taoe.
Pang Jan lantas kasi ketrangan dengen ringkes, kamoedian ja berkata: Kaloe itoe prampoewan dateng, kita moesti berdiri di atas angin, dengen begitoe, itoe prampoewan tida bisa goenaken iapoenja wasiat. Itoe barang aneh diseboet Ngosek-bie-hoen-pee, jang perloe moesti mendapat angin boewat membawa baoenja obat jang tersimpen dalem itoe selampe.
