— 176 —
FATSAL XII.
Tatkala sapasang kamanten masoek ka kamar, dalem kamar boekoe ada disediaken satoe medja santapan dan minoeman. Louw Tien berdoedoek di tengah-tengah, di tempat besar berdoedoek Tjoei Liong, sedang di sabelah bawah manemenin toewan roemah, Lou Khay. laorang sembari makan dan minoem sembari pasang omong. laorang menanjaken Louw Tien poenja kampoeng kalahiran di mana dan siapa iapoenja sobat-sobat, sateroesnja bagimana ia bisa berkenaan sama Pang Jan dan sabaginja. Louw Tien ada satoe pamoeda djoedjoer, jang tida bisa mendjoesta, sekali poen ia kasi djawaban dengen menjimpang sabrapa djaoe jang ia bisa, toch lama-kalamahan iapoenja omongan djadi bertentangan sendirinja. Hal mana soeda membikin Tjoei Liong djadi terprandjat dan heran. Di laen fihak Lou Khay lebih siang soeda denger itoe anak moeda poenja omongan jang tida tjotjok satoe satoe sama laen, maka ia lantas kasi tanda dengen lirikan pada Tjoei Liong. Kamoedian iaorang lantas pada berbangkit dan kaloewar dari itoe kamar. Louw Tien denger di sabela blakang soeda terdjadi gerakan apa-apa, maka itoe waktoe ia lantas poera-poera sinting dan menepok medja.
„Omongan jang baek selamanja tida taoe dibitjaraken di blakang orang,” kata ia. „Djika kaoe orang maoe ada omongan apa-apa, mengapa tida maoe dibitjaraken sadja di hadepan kaoe poenja Louw Toaya?”
Tjoei Liong lantas balikin kombali badannja sembari mengawasi pada itoe pamoeda. „Sabetoelnja kaoe she apa ?” menanja ia.
„Kaoepoenja kongtjoe-ya she Louw dan bernama satoe hoeroef Tien dan orang kalahiran Ham-khong-too, kampoeng Louw-kee-Tjhung.”
„Tjan-thian-tjie, Lou Hong, kaoe poenja perna apa?” menanja Lou Khay.
„Itoelah akoe poenja ajah,” kata Louw Tien, jang dalem
