— 174 —
Ia-orang terpentjar menghamperi itoe roemah, koenjoeng-koenjoeng kaliatan Pang Jan berlompat kaloewar, maka Tio Poo lantas sadja madjoe menerdjang sembari memaki dan mengajoen iapoenja golok jang terhoenoes. Kee Sian poen dateng membantoei kawannja. Pang Jan poenja ilmoe kepandean memangnja sanget berwates, bila ia menggoenaken sendjata golok masi mendingan, sekarang ia goenaken satoe pedang, soeda tentoe sadja terlebih lagi koerang enak bagi ianja. Bagi Kee Sian dan Tio Poo ia tida koewatirken, tapi jang ia paling koewatirken adalah Lou So Tjin.
Tjoema beroentoeng dalem bebrapa lamanja itoe prampoewan tida kaloewar manerdjang padanja. Sebab sabagitoe lekas ia dapet denger di sabelah loewar ada Kee Sian dan Tio Poo poenja soewara, jang lagi mengepoeng pada Pang Jan, ia lantas berseroeh: „Kadoea engko, djangan lepasken itoe pendjahat lari.” Kamoedian ia lantas balik kombali dalem kamarnja dan memboeka peti boewat mengambil iapoenja Ngo-sek-bie-hoen-pee. Lantaran apa Pang Jan poenja djiwa djadi bisa katoeloengan. Kaloe boekannja itoe salampe tersimpen dalem peti, satoe kali ia keboetken itoe barang, tentoe sekali Pang Jan lantas roeboe pangsan dan djika satoe kali ini ia tertangkep lagi tentoe orang tida maoe berlakoe moera padanja.
Pang Jan soeda tentoe sadja tida ada itoe napsoe boewat bertanding lebih lama sama itoe doewa pendjahat, lantas sadja ia berlompat kaloewar dari kalangan teroes merat ka djoeroesan depan. la berlompat naek ka atas gentengnja itoe roemah blakang da uliwati woewoengannja, kamoedian ia menoedjoe ka kamar pinggir jang di sabelah Barat, jaitoe di sabelah blakangnja itoe kamar boekoe poenja lataran. Oleh kerna itoe soewara riboet di sabelah blakang ada begitoe keras, orang-orang jang lagi berada di depan semoewa dapet denger hal itoe. Pang Jan liat dari itoe kamar boekoe ada kaloewar bebrapa orang, pertama Lou Khay, kadoewa Tjoei Liong dan katiga Louw Tien, semoewa menengteng sendjata terhoenoes.
