— 173 —
han tida kliroe. Kee Toako, bantoein akoe tangkep ini manoesia boesoek.”
Pang Jan kenalin, orang jang bitjara ada Tio Poo, orang siapa seperti tadi soeda dibilang, telah adjak Kee Sian pergi ka loewar boewat bitjara resia. Kerna Tio Poo masi teroes gelain Kioe-bwee-sian-ho, kaloe ia belon bisa dapetken si eilok hatinja masi teroes penasaran sadja. Tatkala ia adjak Kee Sian ka tempat sepi, lantas sadja ia kasi taoe bahoewa Lou So Tjin menaro tjinta padanja dan maoe kawin padanja.
„Itoelah tida nanti bisa kadjadian, sebab sekarang iaorang soeda sembajang di hadepan medja samkay,” kata Kee Sian. „Kaloe sadja kape lebih siang kasi taoe padakoe, nistjaja akoe maoe toeloeng lamarken boewat kaoe; tjoema sadja belon taoe apa diloeloesken atawa tida. Lagian kita sama Lou Toako boleh dibilang sobat jang rapat, itoe lamaran sabetoelnja tida terlaloe enak boewat dimadjoeken.”
„Mengapa boleh tida enak sih, malahan Lou Toako sendiri doeloean ada mengandoeng itoe maksoed.”
„Biar bagimana djoega, ini waktoe soeda tida bisa. Ibarat beras soeda djadi boeboer.”
„Akoe ada satoe daja, kaloe sadja soedara soeka membantoe padakoe, akce ada satoe niatan.”
„Niatan apa?”
„Kaoe bantoein akoe melanglang. Sebab akoe maoe menoenggoe sampe Pang Jan tidoer poeles, kamoedian akoe maoe masoek ka dalem kamar penganten dan boenoeh mati padanja. Dengen begitoe, itoe penganten prampoewan lantas mendjadi satoe djanda. Dan itoe waktoe, kaloe akoe madjoeken lamaran pada Lou Toako, boekankah akoe poenja lamaran itoe djadi gampang bisa ditrima ?”
„Kaloe kaoe maoe djoega berboeat begitoe, baeklah, akoe maoe membantoe.”
Begitoelah itoe doewa pendjahat berdami dengen mateng dan koetika iaorang sampe ka lataran dekat kamar penganten, djoestroe pada waktoe Pang Jan memboenoeh itoe boedjang prampoean. Itoe doewa pendjahat djadi merasa heran.
