―172―
salampe Nge-sek-bie-hoen-pee, baroelah ia boenoeh pada Lou So Tjin. Tapi ini doegahan ada sanget kliroe, sebab Lou So Tjin manatah bisa tidoer poeles!
Pang Jan koetika meliat Lou So Tjin soeda menghoenoes golok, ia taoe bahoewa ia boekannja itoe prampoewan poenja tandingan. Ia poera-poera membatjok sama pedangnja, berbareng dengen itoe ia tarik kombali sendjatanja dan balikin badannja memboeka keree dan teroes berlompat kaloewar. Itoe waktoe satoe boedjang prampoewan mendatengin dan dari sinarnja lampoe ia kenalin itoe orang jang berlompat kaloewar ada kamanten lelaki.
„Soeda terdjadi a....."
Tapi pada sabelonnja itoe boedjang bisa melandjoetken iapoenja bitjara, lebih siang iapoenja kapala soeda terpisa sama iapoenja badan, kerna Pang Jan poenja tabasan pedang. Satoe boedjang prampoewan jang laennja tida brani mendeketi dan doewa boedak prampoewan jang djoega berada di sitoe, lantaran katakoetan dengen goegoep pada berseroeh: ,,Toeloeng! Pemboenoeh! Toeloeng!"
Dalem sasaät itoe djoega, Lou So Tjin berlompat kaloear dari iapoenja kamar.
,,Hei, lelaki binatang, bagoes sekali kaoe poenja perboewatan, soeda bikin tertjemar akoe poenja nama!" lata ia dengen geregetan.
Pang Jan berlompat kaloewar dari itoe roemah sampe ka satoe lataran. Biar poen kaädahan di sitoe sangat gelap, tapi pada sasoedanja ia meremken doeloe dan koetjek-koetjek kadoewa matanja, dengen perlahan ia djadi biasa sama kagelapan. Mendadak dari satoe pinggiran ada berlompat menerdjang satoe orang.
,,Manoesia boesoek!" berseroeh orang itoe. "Dari satadian akoe soeda mendoega, bahoewa kaoe boekannja mengandoeng maksoed baek; sekarang ternjata akoe poenja doega-
